Way bagyong makahulga

Labing uwanon nga Sinulog nga akong na-coveran pila ka tuig ang nilabay way bagyo. Labihang kusoga sa bunok sa uwan samtang namahuway ug naniudto ang dancing contingents sa bahin sa ruta diin sila naabti sa udtong tutok. Nakabentaha pag-ayo ang may props nga higanteng mga pandong. Apan kasagaran sa dancers ug mga manan-away hingpit nga nangabasa.

Naabtan ko sa kusog nga uwan samtang nagsubay sa Colon sa downtown area. Taga tuhod ang baha. Nagdinaganay ang katawhan pagbundak sa uwan. Dihang nituang na wa sila managana pag-ubog sa baha. Nga way nangamatay sa pneumonia ug leptospirosis liwas sa Piyesta Senyor niadtong tuiga maoy dakong milagro ni Senyor Sto. Niño.

* * *

Labing nakahasol sa galleon ni Senyor Sto. Niño di sab bagyo. Ni dagkong bawod. Kun di ang pagka-aberiya sa makina. Nakalawig na lang kay giubayan sa laing barko sa Philippine Navy. Wa hinuon mahitabo atol sa Piyesta Senyor. Di sab ang imahen ni Senyor Sto. Niño ang sakay.

Kun dili ang imahen ni San Pedro Calungsod. Atol sa fluvial procession gikan sa kadagatan sa Mandaue City paingon sa South Road Properties sa Dakbayan sa Sugbo dayong pahigayon sa National Thanksgiving Mass nga gitambongan sa kapin sa milyon ka mga deboto. Human sa mabulukon niyang canonization sa Roma nga giduma sa kanhi Santo Papa Benedict XVI.

* * *

Sa ato pa, ang hulga sa bagyo sa fluvial procession karong Sabado ug sa Sinulog Grand Parade karong Domingo maoy labing una sa atong panahon. Samtang nagsuwat ko ini naghabuhabo na sa amihanang Sugbo. Pila ka takna sa wa pa ang gitakda sa Philippine Atmospheric, Geophysical and Astronomical Services Administration nga pagkahimong bagyo sa low pressure area nga naghasol sa Kabisay-an ug Mindanao sa niaging usa na ka semana.

Samtang niangkon nang mga tigpasiugda nga bagyo ray makapugong sa tinuig nga kalihokan way bisan usang deboto nga akong nasugatan sa Basilica del Sto. Niño ang nipadayag og kabalaka ni nihatag og importansiya sa kahimtang sa panahon.

* * *

Tinuod, ang bagyo ug ubang katalagman di gyod makahudlat sa pagtuo. Mahimong makapasamot pa gani hinuon sa kahugot sa debosyon. Gani maoy paniid sa kaparian sa basilica nga, sama sa karaang Sugbo, mas modaghan ang manimba sa Piyesta Senyor matag human sa dagkong katalagman.

Labing nahulga sa bagyo mao ang mga negosyo nga nikabayo sa Piyesta Senyor. Kay kun makanselar ang naandang kalihokan, nga gipamugos paghulagway nga kulturanhon apan sa tinuoray, ug ato-ato ra ni, lunlon diay pahimus ug kiat-kiat, way halin, way minilyon ka mata nga makakita sa gipasundayag nga mga panagway, mga ngan ug mga produkto ug maanugon ang minilyon ka pesos nga gigasto sa pagpangandam. Sa way pagpananghid ni Senyor Sto. Niño.

* * *

Email: [email protected]