Wanted

Ang departamento sa pamuo nagpagawas og listahan sa mga trabaho nga wala nay nanarbaho.

Ang listahan naglangkob niining mosunod: architects, chemical engineers, chemist, licensed librarians, medical technologists, pilots ug aircraft mechanics.

Tungod sa kakuwang na sa mga mosulod sa maong trabaho ang departamento sa pamuo ug ang mga magpapatigayon dinhi sa Pilipinas naglaraw sa pagtanyag na niini ngadto sa mga langyaw.

Pero, tinuod ba ugod nga nagkulang ta og mga aplikante sa maong mga trabaho nga ato nang nahisgotan? Tan-awa kuno sa imong palibot wala ba kay gikatupad nga architect nga nagtambay ug medical technologist nga nagpuyo lang sa balay. Kun wala kay makit-an nagpasabot kana nga atoa na sila sa gawas sa nasud ug atoa na nanarbaho.

Tungod sa ka gamay sa suweldo dinhi sa nasud dili lang mga architect, chemical engineers, chemist, licensed librarians, medical technologists, pilot ug aircraft mechanics ang nanglangyaw sa gawas ug nanarbaho didto, daghan sila ug apil na nila ang mga maestro ug maestra.

Hapit na mahurot ang mga skilled workers ug mga professionals sa nasud. Hangtod dili makahatag og suholan nga katumbas sa gihatag ngadto sa gawas sa nasud ang mga kompanya dinhi sa Pilipinas dili gayod mohunong ang pagpanglangyaw sa atong mga skilled workers ug mga professionals.

Ang pagtanyag sa Pilipinas og trabaho sa mga langyaw nagpamatuod lamang sa giingon sa mga magpapatigayon nga daghang bakante nga trabaho sa nasud pero ang naka apan ang mga aplikante dili mga kuwalipikado sa trabahong ilang giaplayan.