Wa kinahanglana'ng bisita
Nagsugod na'ng kagahob dinhi sa dakbayan tungod sa mga kalihokan sa Sinulog.
Nidagsa na sab ang mga bisita gikan sa nagkalainlaing dapit sa nasud ug bisan na sa kalibutan aron pagsaksi sa gihulagway nga usa sa labing mabulokong festivals sa nasud, ang Sinulog.
Bisan ang wala nato kinahanglana'ng mga bisita nangabot na dinhi sa dakbayan. Mao nga ang atong kapolisan todo kayod pagbantay nila aron malikay sa piligro ang publiko.
Saludo ko sa paningkamot sa atong kapolisan pagsiguro nga hapsay ug malinawon ang Sinulog. Gikan sa kaugalingon niining mga sakop hangtod sa nagkadaiyang hut-ong sa katilingban nga mamahimong makatabang sa pagbantay sa Sinulog gitigom sa mga opisyal sa Police Regional Office-7.
Bilib ko sa initiative nilang PRO-7 director Danilo Constantino, Regional Intelligence Division chief Paul Labra, II ug uban pang naglangkob sa atong kapolisan nga gitigom ang mga lider sa muslim community sa Sugbo, mga security agency operators, transport operators, ug uban pang sektor nga dako og ikatampo sa pagbantay sa kalinaw. Ang usa sa programa sa kapolisan nga sa akong tan-aw epektibo mao ang ilang pagpang-apud-apod og paypay nga dunay hulagway sa mga pinangita sa balaod ug numero sa mga buhatan sa kapolisan.
Dako kaayo og ikatabang ang maong mga paypay tungod kay gawas makahupay sa kaalimoot posibling makaluwas ni og mamahimo untang biktima sa kriminal.
Ang kriminal nga makakita nga nikatap ang iyang dagway pinaagi sa paypay, inay mogawas aron sa paghimo og laing krimen mapugos ni sa pagtago sa kabalaka nga dunay makaila niya.
* * *
Makabungog gihapon nga kadaugan ang naangkon sa mga kaalyado sa Team Rama atol sa gihimong piniliay sa Barangay Councilors League of the Philippines-Cebu City Chapter sa miaging Sabado.
Giharos sa team nga gipangulohan ni Atty. Raymond Garcia ang tanang posisyon sa BCLP ug way bisan usa sa team sa nagpasubli nga si konsehal Franklin Ong sa Kasambagan ang midaog.
Kun basihan ang resulta sa BCLP ug ang niaging ABC elections tataw na ang pagdahili sa puwersa gikan sa pagdominar kaniadto sa Bando Osmeña Pundok Kauswagan kon BOPK.
Ang resulta sa BCLP elections misilyo sa kamatuoran nga bag-o na ang hari sa dakbayan.
Napamatud-an ni Mayor Michael Rama nga di tinuod ang panultihon kaniadto nga ang dakbayan sa Sugbo bisa'g unsaon Osmeña gyud gihapon.
Ang nahitabo maoy reyalidad sa politika. Ang samang mga kaalyado nga nituboy ni Rama ug sa iyang grupo sa pagkakaron mao ra usab unya ang samang grupo nga mobudhi niya inig abot sa panahon. Sama nga sagad nila mao sab kaniadto ang mga tawo nga nagpaluyo sa giilang lider sa BOPK nga si Tomas Osmeña.
* * *
- Latest
