Obserbasyon lang

Kining ato komentaryo lang ni sa atong naobserbahan sa prosisyon sa Black Nazarene didto sa Quiapo, Manila, adtong miaging Huwebes. Giingon sa usa ka tinubdan nga mga usa ka milyon ngadto sa lima ka milyon ang mga deboto nga nangapil sa prosisyon.

* * *

Giingon sa balita nga wala pa gani makahuman si Arsobispo Luiz Antonio Cardinal Tagle sa iyang misa sa Quirino grandstand, nag-stampede na ang mga tawo ngadto sa altar aron mohikap sa imahen ni Ginoong Hesus Nazareno.

* * *

Naputol ang misa apan naninguha ang buotan nga arsobispo nga humnon gyud ang misa sa ilawom sa grandstand. Ka way tahod sa misa labi na sa ilang patron nga gimisahan.

* * *

Suma sab sa balita ug atong nakita sa tv ang karo nga nagdala sa Black Nazarene napuno sa mga tawo nga nanakay ug nagwarawara og tualya. Hapit dili na makita ang patron. Diha pay laing nag-ilog  mokatkat sa karo.

* * *

Dili man to prosisyon ang giingong prosisyon kay naglamok-lamok ra man. Wa may pari nga miuban sa karo ug wa say mga sakristan nga nagda og kandila nga mao man gyud ang feature sa Katolikong prosisyon bisan asa sa kalibutan.

* * *

SA LAING BAHIN ... Unya sa Sabado Enero 18, ang solemn procession of the Miraculous Image of Sr. Sto. Niño. Suwayi ninyo komparar sa atong prosisyon ug sa prosisyon sa Quiapo...Pit Senyor sa atong mga higala magbabasa.