EDITORYAL - Mga guwapang mangunguot sud sa Basilica

Milutaw  na  ang  kamatuoran nga sa panahon  nga  magpiyesta ang  katawhan  ning  siyudad modugok usab  ang  mga  mangunguot.

Karong Sinuloga  nasuta na  gyud  sa kapolisan  nga  gawas  sa mga  lalaki,  may  mga  guwapa  usab  nga  babaye  nga  nakuha  sa CCTV sud  sa Basilica nga  nanguot.

Apan wa pa kini  hidakpi sa  mga otoridad kay abtik kuno  kaayo,  inigkalipat  sa  biktimahunon, aw  wagtang  gyud ang pitaka  niini.

Wa pa  masuta  kun taga  diin  kining  mga  babayhana  ug unsa  na  usab  sila  kadugay  sa ilang  propesyon  nga  pagkamangunguot.

Ang nakita sa kapolisan duha  ngadto sa tulo  ang  usa ka  grupo  sa maong  mga  babaye,  ug wa  pa  usab  nila  hisayri  kun  pila  kini  ka grupo.

Hinuon  tungod  kay  mga dagwayan  kuno  kining mga  babayhana, may  mga  uyab  gyud  kini,  nga  basin  mangunguot  usab.

Busa  kun  di magbantay  ang  mamistahay,  segurado  nga  mouli  nga inay  malipay, kaguol  ang  mohasol  sa ilang  galamhan  ilabi na  kun  dagkong  bulto  sa kuwarta  ang  makuot  gikan  kanila.

Di ta dayon  mobasul  sa kapolisan tungod  kay  daghan  ang  ilang gibantayan.

Kun makuotan  man  ang mamistahay, way  angay  nga  unang  basulon  kundi  ang  nakuotan  kay  basin  nagdanghag  lang  usab  kini  nga  wa magpakabana  sa iyang  mga  butang.