Katilingbanong Sinulog

Basilica del Sto. Niño, Cebu City--Haskang sayona sa pagsud ug paggawas dinhi alang sa bisan unsay maatlan sa 11 ka Santos nga Misa matag adlaw matag usa ug tunga ka oras gikan sa alas-4 sa kadlawon hangtod sa alas-8:30 sa gabii. Sukwahi sa mga Piyesta Senyor sa akong kabatan-on nga magkadusingot ug magkapuliki ka og pangita og kasudlan ug kagawasan tungod sa kanihit ug kahagip-ot sa mga agianan.

Salamat sa bag-ong rector, si Padre Jonas Mejares, nga maoy moduma sa ikaduhang sunudsunod nga Piyesta Senyor karong tuiga, nadugangan pa ang mga ganghaan pinaagi sa pagbuslot sa koral sa habig sa Osmeña Blvd. ug pag-abli sa tanang ganghaan sa mga dan Burgos ug Magallanes.

* * *

Di na kapalapdan ang dakong wanang sa Pilgrim Center nga kanunay’ng lamyon ug kuwangon tungod sa kadaghan sa mga deboto nga mosimba ug mohawok sa urna sa milagrosong imahen ni Sto. Niño. Naibanan pa gyod tungod sa pagkahagsa sa kampanaryo atol sa kusog nga linog niadtong Oktubre 15, nga nakaserado sab sa karaang simbahan tungod sa kabalaka sa kaluwas sa mga deboto tungod sa nangliki nga mga bungbong.

Apan ang mga tagduma sa Piyesta Senyor nakakita og dugang luna alang sa minilyon ka deboto: Gipalibotan og higanteng LED screens ang Basilica ug gipahimutangan og mga lingkoranan ang Plaza Sugbu alang sa mga manimbahay nga di na makasud.

* * *

Nakatabang pagpaluag sa pagsud-gawas sa mga deboto ang pag-abli ni Padre Mejares sa basilica 24 oras matag adlaw pagsugod sa nobenaryo hangtod na sa Piyesta Senyor. Bisan tungang gabii o sayong kadlawon makahimo nang mga deboto paglinya alang sa ilang turno paghawok ug pagpangilaba sa tiilan sa urna sa orihinal nga imahen ni Senyor Sto. Niño.

Nakapadugang sa kasayon sa mga deboto dinhi ang bugnaw’ng huyuhoy sa hangin tungod sa pag-us-os sa temperatura karong semanaha. Ang hinay’ng uwan nga mokusog kun mahinayon pagsud ang unang bagyo sa 2014 karong weekend wa makapa-islag sa mga deboto. Gitataw hinuon sa Pagasa nga di super typhoon si Agaton.

* * *

Usa sa kausaban nga Piyesta Senyor nga gipahibawo nilang Padre Mejares ug Atty. Paul Yabao, fiesta consultant, mao ang pagsayaw sa tradisyonal nga Sinulog matag human sa kataposang misa sa matag adlaw sa nobenaryo, inay sa naandan nga human lang sa Pontifical Mass sa bisperas sa kapiyestahan.

Matod ni Yabao makapadasig kaayo ang pagpabilin sa kaliboan ka manimbahay sud sa dul-an sa oras aron pagduyog sa katilingbanong pagsayaw alang sa ilang mga pangaliya ug mga pasalamat sa Balaanong Bata. Usahay mapugos na lang sila paghangyo sa mga deboto nga undangon ang sayaw aron maandam nang Pilgrim Center alang sa unang misa sa alas-4 sa kadlawon sa pagka sunod adlaw.

* * *

Email: [email protected]