Saad napukling

Ang gisaad sa halandong mayor nga umento sa financial assistance alang sa senior citizens ning dakbayan, dili matuman. Ang P6,000 mao ra gihapon. Ang pasangil mao nga ang Konseho wala mo-aprub sa P10 billion nga gi-propose  nga budget alang sa tuig 2014.

* * *

Nalipay na unta ang mga tiguwang. Diha’y pipila ka mga nagtuo gayud sa gisaad sa mayor nga nangutang na sa mga suod nga silingan ug ang uban midagan sa five-six operators.

* * *

Mao na nga kun naay mosaad, ayaw gilayon tukba ang saad. Hinumdumi ang panultihon o sanglitanan sa mga Aleman: “Ayaw ibutang sa dunggan ang gisaad, anha ibutang sa kamot.

* * *

Daghan baya intawon nga mga tiguwang ang hugot nga mituo sa atong mayor. Nalimot sila nga unay sa tawo ang pagkamalimtanon (sa saad) ilabi na niadtong mga tawo nga gawas nga sila mga tawo lamang mga politiko pa gyud.

* * *

Apan naay mga tiguwang nga way reklamo. Dawaton ra nila ang P6,000. May na lang kuno kay sa wa. Lakaw kuno sa tanang karsada sa siyudad tibuok adlaw kun duna ba kay mapunitan nga P6,000.

* * *

SA LAING BAHIN ... Pit Senyor ngadto sa atong mga higalang magbabasa ning Banat News. Lakip na ang atong mga higala diha sa Pardo Public Market ug mga tindahan libot niini. Salamat sa inyong suporta sa Banat News.