Pangindahay sa pagbag-o sa tuig

Sa pagsulod sa Bag-ong Tuig  daw dili usab kalikayan  sa katawhan ang pagpangindahay sa hingpit nga pagbag-o sa kahimtang sa mga buhatan sa kagamhanan nga ubanan sa matinud-anon nga  pagpangalagad  sa ilang tagsa-tagsa ka mga kaakohan sa matag katungdanan nga ilang gihuptan.

Kay kun walay makitang kausaban sa kasamtangan kahimtang ug  dili gayod makakita og katagbawan daw bation usab og kasagmuyo ang katawhan kinsa walay laing mahimo gawas sa pagbagulbol sa hilom sanglit sa matag tuig bugtong lamang ang mabag-o ang kalendaryo ug dili ang kahimtang sa mga buhatan ug ang pagserbisyo sa mga opisyal sa goberno. Sa mga buhatan sa goberno nga sukad kaniadto daghan na kaayo ang gitinguhang kausaban sa pagbag-o mao ang buhatan sa Land Transportation Office (LTO) nga gihimo na ang daghan kausaban sa tumong ug tinguha sa kadagkoan nga matubag ang pangindahay sa katawhan nga gialagaran.

Naglakip na sa gihimo nga kausaban mao ang pagwagtang sa drug test sa mokuha og bag-o o magpa-renew sa mi-expire na nga lisensiya sa pagmaneho human usab sa pagpatuman sa bag-ong balaod nga nagwagtang na niini tungod kay nakita man nga dili kini epektibo. Gihigpitan usab hinuon sa gipatuman nga bag-ong balaod ang pagmaneho og sakyanan  nga hubog ug high sa paggamit sa illegal nga drugas pinaagi usab sa akto gayod nga pagdakop ug pagpahamtang og labing bug-at pa nga silot niini.

Daghan pa nga mga kakulian sa buhatan sa LTO nga sibaw kaayo nga gikataho sa nangaging katuigan nga namatikdan gihapon nga mga fixer  nga naglihok sa matag buhatan niini.

Ang  walay koneksiyon sa telepono  nga maoy hinungdan sa pagbagulbol sa mga tawo  kay imbes manawag na lamang unta sila sa pag-follow up sa ilang gi-process nilang lisensiya o rehistro maoy ilang himoon ang pagbisita na lamang gayod sa buhatan niini.

Sa paghingalan sa pipila ka mga buhatan sa LTO  nga nagkinahanglan nga kahatagan na og kausaban ang kahimtang mao ang dakbayan sa Mandaue nga buhatan nga gialigar sa mga tawo nga mipadangat og reklamo nga gawas nga walay telepono  wala pa gayo’y kaugalingong linya sa tubig hangtod niining panahona.