Maayong pag-abot 2014

Biyaan ta ang tuig 2013 sa walay pagreklamo sa daghang katalagman nga miigo kanato ug sugaton, himamaton ingon man abiabihon ta ang tuig 2014 sa daghang mga panghinaut nga wala na unta’y linog, bagyo, gubat, baha ug uban pang kalamidad nga moabot ug moigo dinhi sa nasud.

Lisod man tuod natong makalimtan ang tuig 2013 tungod sa 7.2 magnitude nga linog nga misentro sa Bohol ug miigo usab sa Sugbo, kusog kaayong bagyo nga mimugna og gibana-bana nga 15 ka metros nga gitas-on sa dagat nga mihandos sa kabalayan ug mga balay patigayon sa mga lalawigan sa Kabisayaan, gubat sa Mindanao, baha ug uban pang kalamidad ug katalagman sa Luzon diin ang tanan mipatay sa liboan ka mga kinabuhi, dili usab nato ikalimod nga daghan ta og nakat-onan sa nahisgotang mga kalamidad ug katalagman.

Ang nahisgotang mga kalamidad ug katalagman nagtudlo kanato sa pagpabiling lig-on ug sa pagbangon gikan sa pagkahapla sa bagyo. Ang nahisgotang mga kalamidad ug katalagman nagtudlo usab sa ubang kanasuran sa pagpakabana ug pagpanaghiusa sa pagtabang sa ilang mga silingang kanasuran nga nanginahanglan sa ilang tabang. Ang nahisgotang kalamidad ug katalagman nagtudlo sa mga nagbangi nga kanasuran sa pagpadaplin sa ilang away aron maoy unahon sa pag-atiman ang nasud sa Pilipinas nga nalusno sa linog, nagkadugo sa gubat ug naanod sa baha.

Ugma sa pag-abot sa Bag-ong Tuig 2014 kita manghinaut nga wala na unta ang nahisgotang mga kalamidad ug katalagman ug hingpit na kitang makabarog.

* * *

Amo diay nga pasalamatan ang Cebu Lions Club pinangulohan sa ilang presidente nga si Lions Salazar ingon man sila si Lions Richard Rodriguez ug Ed Sanchez sa kinasingkasing nilang pagtabang sa TAMA organization sa Quiot, Cebu City.