Pasakit sa OFWs

Kadaghanan sa atong mga Overseas Filipino Workers namauli karong panahona dinhi sa nasud aron ikauban ang ilang pamilya panahon sa Pasko ug Bag-ong Tuig.

Ug tungod kay daghan silang nanguli, siguradong dako sila og natampo sa pagbuhi sa atong ekonomiya. Bisan kadtong wala makahigayon pagpauli, siguradong wala ni malimot pagpadala og kwarta sa ilang pamilya nga nahabilin.

Ang mga igsoon tang pinoy nga tua na manimpalad sa laing nasud maoy hinungdan nga taliwa sa kalibutanong krisis sa ekonomiya ang Pilipinas molahutay tungod sa ilang mga dollar remittance.

Gani ang atong gobyerno miila nilang mga "buhing bayani". Apan samtang ato silang giulog-ulogan og hatag sa maong titulo wala himoa sa atong gobyerno ang maayong pagtagad alang nila nga haum sa usa ka bayani.

Nagkahinabi mi ni Carmi Cavanlit, kanhi kauban sa buhat nga karon atua na magtrabaho sa Singapore, ug iyang giasoy unsa kapait ang iyang kasinatian sa mga buhatan sa atong gobyerno dihang iyang gihikay iyang mga papeles pagbalik sa Singapore.

Gawas sa pagtapon tapon og buhatan sa gobyerno nga kinahanglang adtoon labihan ka hinay sa serbisyo.

Matud niya miabot siya'g unom ka oras paghikay sa iyang dokumento sa OWWA, POEA, Philhealth, Pagibig, ug uban pa.

Okey lang og magpaabot ka og ingon niini kadugay kun komportable ang imong pagkabutang. Apan kun naghuwat ka ingon niini kadugay ilawom sa naglagiting nga kainit sa adlaw gawas sa mga buhatan sa gobyerno samtang naglinya nga naghuwat sa imong turno, tingali di gyud ka'ng kapaabot nga dunay usa nga malipay.

Dugangan pa nga ang usa sa mga hinungdan sa kalangan mao ang nagpunay og tabi ug nangorpyo nga mga kawani. Ka pait.

Hinaot atimanon ni sa atong gobyerno. Atong himuon nga sayon ug komportable ang paghikay sa papelis sa atong mga OFWs.

Angayang ipakita sa atong gobyerno nga importante ang mga OFW pinaagi sa maayong serbisyo ug dili kay pulos lang ulog ulog.

Konswelo na gani ang gihimo nilang sakripisyo nga malayo sa ilang pamilya tungod sa dakong kakuwangan sa atong kagamhanan paghatag og maayong trabaho dinhi sa nasud unya ato pa gyud silang lisudlisuron.

Karon kay daghan ang gipaabot nga maghikay sa ilang mga dokumento mas maayong dugangan sa POEA, OWWA  ug uban pang ahensiya nga agian sa mga OFWs ang ilang mga sakop nga moatiman nila.

Kini aron sa ingon mas paspas ang paghikay sa ilang mga papelis.