EDITORYAL - Ang Judiciary Development Fund (JDF) sa SC

Ang nasud gidumala sa tulo ka sanga sa kagamhanan nga mao  ang ehekutiba, lehislatiba ug hudikatura.

Ang lehislatiba maoy tig-umol  og balaod  nga  ipatuman  sa ehekutiba  ug huwesan sa hudikatura  sa higayon  nga  may  lalisonon  sa pagpatuman  sa balaod.

Ang maong  mga  departamento pulos  dagko kaayo  og  gahin  gikan  sa  buhis  sa  katawhan  alang  sa ila  untang  tinarong  nga  pagpadagan  sa kagamhanan.

Sa sinugdan malagmit  nagkasabot  ang lehislatiba ug  hudikatura  nga  way hilabtanay  sa ilang  mga pundo kun unsaon nila  pagsikwati  ang kuwarta  nga gigahin  kanila.

Dihang  nabuko  ug nabulilyaso,  gihukman  sa hudikatura  nga  supak  sa  batakang balaod  ang  Presidential Development Assistance Funds (PDAF) sa lehislatiba.

Sa kapungot  sa mga sakop  sa lehislatiba  nga  gikuhaan  sila  og  panginabuhi  sa hudikatura, nanimawos kini  ug  gikulitog   ang  Judiciary Development  Fund (JDF)  sa maong  departamento.

May P5 bilyones  karon nga pundo  sa hudikatura  nga gituohan  sa mga  magbabalaod  nga  giabusohan  paggamit  sa  mga  huwes  sa nasud.

Miingon  ang  mga magbabalaod  nga  di lang  kay  ang  pundo  karon nga P5 bilyones  maoy  ilang sil-ingon  kundi  bisan pa  ang  mga  pundo  niini sukad  pa kaniadto  sa wa pa sila  magbangi.

Paita  kinsa na man  lay  kapiyalan  nato  sa atong  kuwarta?