Unsay buhaton kun ang check nga gi-issue miuntol?

Ang pag-issue sa cheke nga way igong pundo usa ka kalapasan sa balaod. Dili lang usa ka balaod ang nalapas niini kondili duha. Kini mao ang kalapasan sa BP 22 kon Anti-Bouncing Checks Law ug ang ikaduha mao ang Estafa ubos sa Article 315 sa Revised Penal Code. Apan unsa bay imong buhaton kun ang cheke nga gi-issue kanimo mountol. Kana nga pangutana ang atong tubagon karon sa among column.

Dear Atty. Divine;

Aduna ko’y negosyo nga alahas apan pautang. Ang mga buyer nga mangutang sa akong alahas tungod kay nag-involve og dako nga kantidad ako silang pangayoan og post dated checks aron pagseguro nga ila gyud kong mabayran. Sulod sa pipila ka tuig wa ko’y nasinati nga problem until last year nga adunay cheke nga nagkantidad og P 100,000.00 miuntol tungod kay way igong pundo. Ako nang gipahibawo ang nag-issue sa maong cheke apan nagsige lang siya og saad ug kapin  na lang sa usa ka tuig wa pa gyud siya mobayad sa iyang giutang nga alahas. Ang akong pangutana attorney kun mamahimo ba siya nako nga ikiha bisan kun niadtong miaging tuig pa miuntol ang iyang cheke? Unsa may angayan nako nga buhaton aron akong mapasaka ang kaso? Hinaut nga imo kong matambagan kun unsay angayan nako nga buhaton. Daghang Salamat. — Queenie

Dear Queenie,

Bisan kun niadtong miaging tuig pa miuntol ang maong cheke mamahimo pa gihapon nimong ikiha ang nag-issue niini tungod sa iyang nahimong kalapasan sa BP 22 kon Anti- Bouncing Checks Law. Basi sa maong balaod, ang pagpasaka sa maong kaso adunay upat ka tuig nga prescriptive period. Buot ipasabot nga sud sa upat ka tuig gikan sa pag-untol sa iyang cheke mamahimo mo siyang ikiha ug tungod kay last year pa man nahitabo ang pag-untol niini, wa pa mo-prescribe ang pagpasaka sa maong kaso. Gawas sa kalapasan sa Bouncing Checks Law, mamahimo sab nimo siyang ikiha og Estafa tungod kay ang iyang pag-issue og cheke nga way pundo kalapasan sab kana sa Article 315 sa Revised Penal Code. Ang kasong Estafa mo prescribe kana sud sa lima ngadto sa 15 ka tuig, depende sa kantidad nga involve. Apan sa dili pa nimo siya ikiha importante nga mopadangat ka niya og notice of dishonor, kinahanglan nga imo siyang pahibaw-on nga miuntol ang maong cheke og aron dili siya maka deny  niini, mas maayo nga mopadala ka niya og demand letter nga imong ipa-receive niya. Ang maayo nimong buhaton karon mao ang pag-adto og abogado aron matabangan ka alang sa pagpasaka sa imong kaso. Hinaut nga akong natubag ang imong pangutana. Daghang Salamat ug Merry Christmas! — Atty. Divine

Kun ikaw adunay pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug  akong tubagon ang inyong pangutana pinaagi sa akong column matag adlaw’ng Miyerkules ug Domingo.