Ang kalibog ni Jose

Dili tiaw ang nasinating krisis ni Jose sa dihang nasayod siya nga ang iyang pangasaw-onon dakong mabdos ug dili siya ang amahan. Mahimo niyang iladlad ang maong kahimtang nga moresulta sa kamatayon ni Maria. Nakahukom siya nga iya na lang bulagan si Maria sa hilom. Apan ang anghel mihatag kaniya og katin-awan pinaagi sa damgo nga ang gimabdos ni Maria lalang sa Espiritu Santo ug pinaagi kaniya ipahimugso ang Dios nga nagpakatawo. Agi’g pagsanong sa maong hagit ug tawag iyang gipangasawa si Maria ug manggihatagong nitahan sa iyang kaugalingon aron atimanon ang inahan ug anak.

Daghanan kanato ang nakasinati sa naagian ni Jose. Adunay mga higayon nga nalibog kita sa mga desisyon nga atong pagahimuon. Sila si San Juan dela Cruz ug Santa Teresa sa Avila ang nitawag niini og Dark Night of the Soul. Gani si Gerald May, M.D. usa ka Psychiatrist ang nihimo og usa elaborate pa gyud nga pagpatidlum sa maong hilisgutan pinaagi ning dha ka mga termino. OSCURA ug Tinieblas. Ang OSCURA (dili tataw kun Obscure sa English) mao ang kahimtang diin ang Dios nipalingkawas kanato gikan sa atong mga walay hinungdang gapos nga niulipon kanato ug gidala kita niini sa pag-ila ug pagsinati mismo sa atong kaugalingon. Sa laing bahin ang tinieblas (yawan-ong kangitngit) ang nagbutang kanato ug naghimo kanatong mas nabilanggo pa gyud sa atong mga sayop nga mga panlantaw nga miulipon kanato.

Ning panahon sa Pasko sa Pagkatawo sa Ginoo, mahinungdanon kaayo nga atong bansayon ang pagkamapailubon aron atong mas matataw ang mensaheng Diosnon alang sa matag usa kanato ning kinabuhia. Dili ang kagahub ug hudyaka ang sukaranan nga makaingon kita, malipayon ang Pasko.