Saludo ko’ng Margot ug Lea

Nakadayeg kaayo ko sa baruganan nila ni Konsehal Margarita “Margot” Osmeña ug Lea Ouano-Japson nga dili modawat sa ihatag nga tag P20,000 nga “calamity assistance” alang sa mata’g opisyal ug kawani sa City Hall.

Husto g’yud ang panahom ni Margot nga angay’ng ikauwaw ang pagdawat sa mao nga kantidad gawas lang kun ang mga modawat biktima sa linog kaniadtong Oktubre 15 ug sa bagyo’ng Yolanda kaniadtong Nobiyembre 8.

 Kun moingon nga “biktima” sa bagyo ug linog nagpasabot kini nga ang balay sa mga tawo nga modawat sa ta’g P20,000 guba g’yud, dili kay igo lang sila nga nakabatyag og pagtay-og sa ilang balay ug nakasinati og kusog nga hangin.

Law-ay man gud kaayo pamation nga moingon nga mopahatag ang kagamhanan sa dakbayan og calamity assistance nga ta’g P20,000. Nganong ang mga kawani ra man sa City Hall ang hatagan? Sila ra ba gud ang mga lumulopyo sa dakbayan?

Ang tinuod, daghan man gani sa mga opisyal ug kawani sa City Hall ang dili lumulopyo sa dakbayan sa Sugbo.

Husto si Margot sa iyang pag-ingon nga salikwaot kaayo huna-hunaon nga ang dakbayan nagsigi’g pakilimos kada adlaw tungod sa iyang “peso-peso fund campaign” aron makatigum og kwarta pagpatukod og bag-ong ospital aron dunay kwarta nga gastohon pagpatukod og bag-ong ospital.

Bitaw, ang tinuod g’yud nga tumong ni Mayor Rama dili ang paghatag og calamity assistance sa mga kawani sa City Hall, kun dili dugang “bonus” apan abtik si Mayor Rama kay kun ibutang niya nga “bonus” madugang kini sa kantidad sa “Personal Services” kon sweldo.

Kun ang kapin sa P80 milyones nga kantidad sa paghatag og P20,000 sa mata’g usa sa subra sa 4,000 ka opisyal ug kawani sa City Hall ibutang nga bonus, molapas na ang gasto sa Personal Services sa gilatid sa balaud.

Ang Department of Budget and Management (DBM) abtik kaayo nga mobantay nga ang gasto sa mga highly-urbanized city sama sa dakbayan sa Sugbo, dili molapas sa 45 percent sa iyang “estimated income.”

Mao kana ang rason ngano nga calamity assistance ang gibunyag ni Mayor Rama ug sa mga sakop sa Local Finance Committee sa tag P20,000 nga ipahatag nila sa matag opisyal ug kawani sa Cebu City government.