Floyd makaluwas ni Manny

Puno gyod diay sa baligho ang kinabuhi. Nagbuntaog nga problema sa buhis posibleng maoy makapahinayon sa kadaghan na suwayi apan wa pa gyod mapahigayon nga labing gikahinaman nga sangka sa boksing sa bag-ong panahon.

Hagbay rang naghagitay silang Manny Pacquiao ug Floyd Mayweather Jr. Apan tungod sa pasangil ni Mayweather nga tiggamitan og ilegal nga drugas si Pacquiao tungod sa panagsungi nilang Mayweather ug ni Bob Arum, chief executive officer sa Top Rank way away nga nahimo. Bisan ang sibaw nga awhag sa mga higante sa boksing ug sa minilyon ka sumusunod sa tibuok kalibotan wa makapatinuod sa makasaysayanon nga sangka. Hangtod nga nabisto ang dakong utang sa buhis ni Pacquiao.

* * *

Dihang nahiagom si Pacquiao sa duha ka sunudsunod nga kapildehan--sa kadudahang pagkapilde niyang Timothy Bradley niadtong Hunyo 2012 ug sa paghagok niya sa ikaupat nilang sangka ni Juan Manuel Marquez pagka Disyembre sa samang tuig--wa na gyo’y nagdahom nga magkasangka pa silang Mayweather.

Kay si Mayweather nga klarong maoy nikakak sa mga panghagit ni Pacquiao atol sa kinapungkayan sa ilang mga karera pila ka tuig nang nilabay nikalit lang og balitok ug nisumbalik pagpanghagit nga magsangka sila human sa dominanteng kadaogan ni Pacquiao batok ni Bam Bam Rios sa Macau, China sa niaging buwan. Apan nagpabilin ang dagkong babag sa sangka. Hangtod nga gipaninglan si Pacquiao sa Bureau of Internal Revenue sa Pilipinas ug Internal Revenue Service sa Estados Unidos.

* * *

Gikatakdang makigkita si Pacquiao ni Mayweather atol sa bakasyon sa Pasko sa iyang pamilya sa Estados Unidos. Nagduda si Mayweather nga nihangyo og tigom si Pacquiao tungod sa dako niyang utang sa buhis.

Bisan sa pasangil ni Pacquiao nga biktima siya sa pagpanggukod sa iyang mga kaatbang sa politika nag-anam na og kabantang ang kadako sa iyang problema sa buhis. Nga masulbad lang kun duna siya’y ikabayad. May sukaranan ang mga pangagpas sa mga eksperto nga P100 milyones ang labing gamay nga bahin ni Pacquiao kun mahinayon ang ilang sangka ni Mayweather.

* * *

Apan di mahitabong makigsangka si Mayweather ni Pacquiao kun si Arum gihapon ang iyang promoter. Salamat sa problema sa buhis ni Pacquiao, mahimong makalingkawas na gyod siya sa mga kuko sa Top Rank.

Nagsugod na pagpanggawas ang mga ebidensiya nga gilupigan si Pacquiao sa Top Rank. Gani segun sa VisionQwest Accountancy Group mokiha na unta si Pacquiao ni Arum sa wa pa putla ang ilang kontrata niadtong 2011. Abunda ang sukaranan ni Pacquiao pagputol sa iyang relasyon sa Top Rank. Di burukinto si Pacquiao busa di problema kun mas gamay ang iyang bahin sa kita sa sangka. Mas dakong problema ang kahadlok ni Mayweather nga si Pacquiao ray makapilde niya.

* * *

Email: [email protected]