Ang kinabuhi maoy sinugdanan sa kamatayon

Ang kinabuhi maoy sinugdanan sa kamatayon. Ug ang kamatayon mobanos sa kinabuhi. Kinsay nasayod kanus-a mosangko ang kataposan? Ang Dios lamang nga maoy magbubuhat sa tanan. Mosugot ka’g sa dili ang tanang butang ning kalibotan imong biyaan kun sakmiton ka na sa kamatayon. Wala’y sanga ni dahon sa kahoy nga matagak kun dili pagbuot sa kahitas-an.

Ang linog nga niigo sa Bohol ug Sugbo nga mikalas og daghang kinahuhi ug kabtangan, panghitabo nga wala palandonga, wala paabota. Wala’y gikatakda nga takna ug dapit aron unta  makapangandam ang katawhan. Moabot lang kini agad sa lihok sa kinaiyahan. Ang Phivolcs igo lang sa pagsukod sa gikusgon sa linog, dili makahatag og pasidaan sa umaabot. Matud pang Ritchel dili ba masukod sa Phivolcs        ang kahadlok sa tawo? Kay hangtod karon gigamhan pa ang mga tawo sa kahadlok sa maong linog nga misukod og 7.2 magnitude diin ang Bohol ug Cebu maoy naigo pag-ayo?

Maayo pa ang Pag-Asa kay mopasidaan nga adunay bagyo nga umaabot. Sama sa bagyong Yolanda, duha ka adlaw sa wala pa moabot ang maong bagyo nakapangandam na ang mga tawo. Super typoon, labing kusog nga bagyo nga moigo sa Kabisay-an, matud sa Pag-asa. Ang wala kapangandami sa mga tawo mao ang storm surge nga wa ma-esplikar pag-ayo sa taga Pag-asa. Ug tungod niini, daghan ang nangamatay sa Tacloban ug uban pang dapit sa lalawigan sa Leyte kay wala makabantay sa pagsaka sa tubig-dagat.

Kadaghan na bang trahedyang miigo sa Lalawigan sa Leyte? Kahinumdoman nga ang barangay Guinsaugon, Saint Bernard, Southern Leyte hingpit nga napapas sa mapa gumikan sa mitabon  nga midahiling lapok kaniadtong Pebrero 17, 2006. Laing makalilisang nga trahedya nga miigo sa lalawigan sa Leyte mao kadtong lunop sa Ormoc, City kaniadtong 1990 nga mikalas og daghang kinabuhi ug ang pagkahanaw sa daghang kabtangan.

Apan kastigo ba gayong matawag gikan sa kahitas-an kining trahedya nga miigo sa lalawigan sa Leyte? Nganong nahitabo kining tanan? Kinsa ang mabasol?

Hapdos ug sakit pa uyamot alang sa mga hingtungdang nahitaboan ang maong katalagman. Hinaot pa unta nga hinuktokan kini natong tanan ug gahina’g igong pagpamalandong.

Ang nakanindot lang sa balita kay nagkalain-laing kanasoran ang mipadala og hinabang nga gipangunayan gyud paghatod sa mga sinaligan sa maong mga nasod aron matabangan ang mga biktima sa bagyong Yolanda nga maoy giisip nga labing kusog nga bagyo sa kasaysayan.

Mora’g nagpalabwanay ang mga nasod sa gawas pagpadala sa ilang mga hinabang. Apan lagi, ang masakit nga kamatuoran kay aduna pay mga dapit nga wala pa makadawat sa maong hinabang. Ngano ba kini? Tungod sa kahinay motuyok sa ligid sa kaangayan. Samot pag lunosan mo sa gutom paabot lang kay moabot ra. Mao ba kini.

Adunay moingon nga gibawi na sa Dios ang hinulaman nga kinabuhi. Tinuod ba nga nanghulam ta’g kinabuhi sa Dios? Tingali baya og wala. Kun dili, gihatagan gyud ang tawo og kinabuhi sa Dios ug kining kinabuhia adunay kataposan. Ang Dios maoy nagpahimutang sa tawo ug Siya ra usab ang magpahamtang.

Kay ang kalibotan dili matawag og kalibotan kun wala’y kulukambiyo sa panahon. Sama nga adunay kahayag ug adunay kangitngit, adunay dato ug adunay pobre, adunay kalipay ug adunay kasakit. Ingon niini ang kalibotan nga atong gipuy-an. Mag-ilis-ilis sa iyang talan-awon.