Accountants ni Pacquiao

Tulo ka tuig ang nilabay gipaninglan si Manny Pacquiao sa Internal Revenue Service sa Estados Unidos sa wa niya mabayri nga buhis sa mga tuig 2006 ug 2007. Kanus-a gisunodsunod niya pagpukan ibabaw sa ring silang Erik Morales (sa ikaduha nilang sangka), Oscar Larios, Erik Morales (sa ikatulo nilang sangka) ug Marco Antonio Barrera (sa ikaduha nilang sangka).

Nalubong hinuon sa daghang pasidungog si Pacquiao maong wa masimhoti sa media ang pormal nga komunikasyon sa IRS nga wa kabayad si Pacquiao sa buhis sa upat niya ka kadaogan: Napili siyang kongresista sa Saranggani ug gideklarar siya nga labing maayong boksidor sa tibuok dekada. Apan sa kredito ni Pacquiao gikuha niya ang serbisyo sa bantogang accountants sa US aron pagtuki sa iyang problema.

* * *

Segun sa Fighthype.com gikontrata ni Pacquiao niadtong 2010 ang VisionQwest Accountancy Group sa pagsubli sa tanan niyang financial records. Nakugang ang accountants sa ilang nakaplagan. Nagkayamukat ang mga dokumento sa mga transaksiyon nga gisudlan ni Pacquiao, nagkatibuwaag nga emails ug unom ka kahon sa wa mahugpong nga mga resibo.

Dihang gisugdan sa VisionQwest paghukngay ang mga dokumento, nahibaw-an nila nga wa magkadimao ang kuwentada sa nagbuntaog nga kita ug mga obligasyon ni Pacquiao. Apan wa matubag ang daghan nilang pangutana. Kay giputol ni Pacquiao ang ilang kontrata dihang magtigom na unta sila pagpatin-aw sa kahimtang sa iyang panalapi niadtong Agosto 2011.

* * *

Labing nakapaalarma sa VisionQwest mao ang kadako sa kuwarta nga gibayad ni Pacquiao ngadto ni Michael Koncz. Kinsa nagsilbi nga iyang business adviser ug busa maoy gitahasan pagbayad sa tanan niyang obligasyon sa buhis. Matod sa VisionQwest way accounting degree si Koncz ug nag-raket pa gyod pagtrabaho sab alang sa Top Rank Inc.

Gipasabot sa VisionQwest nga way accounting organization nga nagpaluyo ni Pacquiao nga mao unta’y mosubay sa tanan niyang kita ug gasto aron mahimong sukaranan pagkuwenta sa bayranang buhis. Bugtong nilang nadawat mao ang listahan nga sinuwat ni Koncz nga way gipataban nga bisan unsang resibo.

* * *

Nisuwat ang VisionQwest ni Pacquiao pagpasabot nga nagkinahanglan sila og dugang dokumento pagtubag sa audit sa IRS nga nagsusi sa kinatibuk-an niyang kinitaan ug gastohan. Kun wa sila’y mapakita nga mga resibo sa mga gasto kapaninglan si Pacquiao sa mas dakong buhis.

Maong nangayo silang Pacquiao sa mga resibo sa tanan niyang gasto sa pamoksing sa US. Gipadad-an sila og upat ka kahon nga napuno sa kaliboan ka resibo sa mga gasto ni Pacquiao sa daghang katuigan. Mao pa gani ilang pagsugod giputol ni Pacquiao ang ilang relasyon. Maong wa mahusay ang mga dokumento. Wa sab matuman ang laing gitahas ni Pacquiao --ang pagsubli sa iyang kontrata uban ni Bob Arum sa Top Rank.

* * *

Email: [email protected]