Sampong sa baha sa kuwarta

 Kun sa pagsubli pa lang gani sa mga porma ug sa mga dokumento nga gigamit sa Statement of Contributions and Expenditures (SOCE) naabtan na og siyamsiyam ang Commission on Elections, unsa na kaha sa mas kuti ug mas mahinungdanong gimbuhaton sa pagsubay sa mga amot nga nadawat ug gasto nga nahimo sa mga nanagan sa niaging piniliay?

Uban ang kakugang gihangop sa mga botante ang wa paabota nga pagpangisog sa Comelec pagpakanaog sa katungdanan sa 422 ka local nga mga opisyal nga napakyas pagsumiter sa tukma nga SOCE. Napawong hinuon dayon ang ilang bilib pagkahibawo nga makabalik ra sab dayon ang mga opisyal sa ilang buhatan kun makurhian nang ilang SOCE.

* * *

Makapabalaka nga timaan nga ang kadagkoan sa Comelec wa magkasabot sa ilang mga lagda mao ang pagdason sa lokal nga mga opisyal sa Comelec sa panagang sa pipila ka hingtungdan nga mga opisyal nga nakasumiter na sila og SOCE. Wa diay tingali matarung pagpasabot sa Comelec ang ilang lagda nga may tukma nga porma nga gamiton ug nga ang mga kandidato maoy mangunay sa pagpirma sa SOCE.

Kun ang lokal nga mga opisyal sa Comelec wa mahibawo sa lagda, unsa na kaha ang mga nidaog sa niaging piniliay nga mas naghinamhinam paglingkod sa katungdanan kay sa pagpangunay paghikay, pagpirma ug pagsumiter sa mga dokumento sa mga amot ug gasto nga di sila ganahang mokuwenta ni mosulti sa tinuod?

* * *

Nga maoy labing dakong kahadlok sa nagpakabana nga mga botante. Ang pagpakanaog sa Comelec sa mga way SOCE dako nang kabag-ohan sa nangaging gipalawalawaan lang nga mga dokumento mga amot ug gasto sa mga piniliay. Apan di kaha kutob ra sa porma ug pirma ang pagpakabana sa Comelec? Sa di pa sila magkarakara na sab pagpangandam alang sa laing piniliay’ng presidensiyal karong 2016?

Kanus-a pa man intawon matarung pagsubli kon natuman bang mga limitasyon nga gitakda sa mga amot ug gasto sa mga piniliay? Kanus-a pa man mabutangan og unod ang mga pagarpar sa Comelec paggukod sa mga malapason?

* * *

Hagbay rang gisugyot nga may mga kawani sa Comelec nga ang bugtong tahas mao ang pagpatuman sa mga lagda sa mga amot ug gasto sa lokal ug nasudnong mga piniliay. Di tingali lisod nga sabton nganong mayoriya sa mga senador ug mga kongresista di ganahan nga motuki sa balaudnon nga molili sa ilang gasto sa kampanya.

Hinaot nga ang wa mahimo sa Comelec sa nangaging mga piniliay mapatuman na human gibasura sa Korte Suprema ang pork barrel system. Gawas lang kun molampos ang Malakanyang ug ang Kongreso pagbanhaw sa binuang pinaagi sa pagmugna og laing ngan mahimong di na gyod makapatuyang sa ilang gasto ang nangalisbong mga politiko.

* * *

Email: [email protected]