Si Binay ug ang 2016 elections

Pagkatudlo ni kanhi senador Ping Lacson pagpangulo sa pagpahiuli sa nagusbat nga mga dapit gumikan sa bangis nga bagyong Yolanda, si Vice President Jejomar Binay mikomentaryo  kuno, nga si Lacson “woud be a welcome opponent in the next presidential elections.“

Unsa man, hadlok siyang Lacson nga maoy mamahimo niyang kaatbang sa 2016, labi na kun magmalampuson si Lacson ning bag-o ug bug-at nga tahas nga gitugyan ngadto kaniya?

Ang maong pamahayag nakadawat og negative nga mga komentaryo gikan ni House Speaker Feliciano Belmonte ug kauban niyang mga kongresista sa Lower House, sama kanila ni Rep.  Elpidio Barzaga Jr sa Dasmariñas City sa Cavite, ug Rep. Winston Castelo sa Quezon City.

Matud nila, sayo ra kaayo ang paghisgot sa 2016 elections, labi na karong mga panahona nga nag-atubang kita sa usa ka makalilisang nga katalagman nga mihugpa sa atong nasud. Mora man og nagdali si Binay paglingkod sa Malacañang.

Gihisgutan usab nila ang pagpang-apod-apod ni Binay sa mga relief goods nga gimarkahan sa iyang ngalan … samtang didto usab  sila si Sec. Mar Roxas ug  Defense Chief Voltaire Gazmin “were attending to the needs of tyhoon  victims in Samar-Leyte.”

Sa laing bahin, dugtong ning atong gihisgutan dinhi nga 2016 elections, duna ko’y nadunggan nga komentaryo (sa Manila radio) nga mikutlo sa usa kuno ka kasaligang tinubdan sa Palasyo nga ang sabakon ni Noynoy nga kandidato pagka-presidente, usa kuno ka babaye.

Kun mao, lagmit mag-bise presidente lang si Lacson. Kinsa nga babaye? Unsay mahitabo ni Roxas? From our end, walay nasayod.

* * *

Now is the time kuno pag-invest dinhi sa atong nasud. Kini tungod sa pag-improve sa atong business climate dinhi. Ang Grant Thornston “Global Dynamism Index,” migrado sa atong nasud og 55.7 points mas improved nga economy kay sa China.

“The Philippines performed best in economics and growth where it got 80 points, owing primarily to high gross domestic product. It also posted high scores in terms of labor and human capital , 67.9 points, as well as business operating environment, 62.4 points,” nagkanayon ang report sa Grant Thornston Global Index.

So, mao ni ang kahimtang sa atong ekonomiya dinhi sa atong nasud. Hinuon, sa pagkakaron, dili pa kini nato ma-felt directly natong mga kabus. Apan, in the long run, sa higayon nga molihok na in full ang pagbubo sa foreign capital, nga makamugna nag employment, mugaan-gaan na ang atong gipas-an nga kalisud sa panginabuhi.

* * *

Gisayon sa atong gobyeno pagsulbad sa mga problema. Pananglitan, ang mga squatters ginganlan og informal settlers. So, waa nay squatter … sulbad ang squatting. Aron dili kita mauwaw nga ang atong mga professional mahimong “maid” didto gawas sa nasud, ato silang ginganlan og mga domestic helpers. So, waa nay Pinoy nga magpa-maid. Unya ang mga Pinoy nga tig-ilo sa adunahan nga mga langyaw, ato silang ginganlan og mga caregivers. Nindot tuod paminawon, di makauwaw.