EDITORYAL - Ang umaabot nga CCMC sa mahalong puwesto

Daghan ang  gikulbaan  ning  gidamgo  nga  Cebu City Medical  Center (CCMC)  nga  gitakdang  itarok  sa  South Road Properties (SRP).

Makabayad  pa  ba  kaha  ang kabus nga  mga pasyente sa  mga  bayranan  sa maong  tambalanan  nga  gidudahan  nilang  mosaka  tungod  kay  mahalon  ang  tokuran  niini.

Apan  way mahimo  ang  kagamhanan  sa siyudad  tungod kay  wa nay  laing  lugar  nga  kabutangan  sa maong  tambalanan.

Tungod  kay  mogasto  og dako  ang  kagamhanan  sa pagpatukod  sa maong  tambalanan, gituohan  nga  di  lamang kutob  diha ang  pagtubo  sa gasto  niini  kundi  bisan sa iyang maintenance  ug  uban  pang  gastus  sa pag-atiman  niini.

Sa laktod kun  mapaslak  ka  sa maong  tambalanan kinahanglang  may  igo  kang  salapi  nga  magasto  sa imong panginahanglan.

Hinuon  tungod  kay  iya  sa kagamhanan,  di  mapapas  ang  pagsalig  ug  pagtuo sa katawhan  nga  mas  barato  kini  kay  sa pribadong  mga  tambalanan.

Ang Piso Mo, Hospital  Ko,  usa  unta sa tinubdan  nga  mahimong  kakuhaan  og  gasto  sa tukoron  nga  tambalanan.

Apan  tungod  kay  gisuta  sa taga  Ombudsman  nga  illegal  ang  maong  kampanya, mura’g  di  tingale  kini maoy  saligan  sa kagamhanan  sa pagpatukod  sa  maong  tambalanan.

Angay  usab  nga  ipasalig  sa kagamhanan  nga  labi  pang  mouswag  ang  pangalagad  niini  ngadto  sa mga  kabus  nga  pasyente.