Personalized nga pangalagad

Tungod sa personalized nga pangalagad ni kapitan Remegio "Bo" Oyao sa Barangay Agus dakbayan sa Lapu-Lapu wala siya’y gibilin nga mga butang sa barangay nga magamit pa sa bag-ong napili nga kapitan sa iyang barangay.

Ang naparot nga kapitan Bo Oyao miingon nga dili angayan nga mahinugon ang bag-ong napili nga kapitan nga si Jovencio Lauron tungod kay gikan sa iyang kaugalingong bulsa ang gigasto sa pagpalit sa mga butang nga gipangguba.

Ang naparot nga kapitan miklaro hinuon nga wala siya magsugo sa pagpaguba sa mga butang nga gigastohan sa iyang kaugalingon salapi.

Sa iyang paglingkod isip bag-ong kapitan sa Agus, Lapu-Lapu maoy misugat ni Kapitan Lauron ang mga guba nga computer units, telepono, sakyanan nga ang ligid pulos na pislat, opisina sa tanod nga wala nay bongbong, toilet bowl ug daghang uban pa.

Tungod ba kaha sa pagkadaghan og salapi ni Bo Oyao siya na mismo ang namalit og mga butang ug kagamitan sa barangay. Pero pobre na ba gyod kaayo ang Barangay Agus nga dili kini makapalit og computer units ug telepono? Hasta ba ang sakyanan sa barangay pinalit sa salapi ni Bo Oyao? Ang tanan ba sa  barangay iyang pinalit sa naparot nga kapitan nga si Bo Oyao maong iya kining gipaguba?

Asa man diay ang Internal Revenue Allotment o IRA sa barangay nga iyang gipangulohan nga personal man niyang salapi ang gipamalit sa kagamitan sa barangay? Motuo mo ni Bo Oyao? Ako dili! Ilara ang lolo nimong opaw kap.

Mamalibad man si Bo Oyao, dili upod ako motuo nga dili siya ang nagsugo sa pagpaguba sa mga kagamitan sa Barangay. Porbida! Ngano ba gyod nga duna may mga tawong dili makadawat sa ilang kapildihan.

* * *

Ako diay i-greet og Happy Birthday si Ms Bambi Vivares nga nagsaulog sa iyang adlaw nga natawhan karong adlawa. Happy Birthday Bams.