EDITORYAL - Unsa man diay ang storm surge?

Mao kini dugokan sa mga pagsaway  sa mga biktima  sa bagyong  Yolanda, tungod  sa kapakyas  sa PAGASA pagpasabot  unsa  kining storm surge.

Ang uban  miingon  nga  kun  gisultian  lang  sila  nga mga dagko kining  bawod  o  kaha  susama  sa tsunami, aw tulin  pa  sa manatad  ang  mga tawo  nga  mag-iyahay  og  ikyas.

Tan-awa  tong  sa Cebu  nga  usa  lang ka tawo  ang  nagdala  og  loud speaker sakay  sa iyang  motorsiklo pagpahibawo  nga  may  taliabot  nga tsunami.

Kaliboan  ka  mga  tiguwang ug  bata  nga naglumba  og  dinaganay  paingon  sa bungtod  nga  bahin  sa Cebu aron maluwas  gikan  sa  tsunami.

Hinuon  di usab  kita  makabasol  sa taga  PAGASA  kay  basin  sila  usab  wa  makasabot  unsa  kining  storm  surge  ug unsay  hitsura  niini.

Sa maong  eksena, husto  ang  ahensya  sa panahon  sa pagbana-bana  nila sa gikusgon  sa hangin  sa bagyong  Yolanda.

Apan misipyat  sila  sa pagpasabot  bahin  sa storm surge, hinungdan  nga  kun hangin lang, aw kinaon  na  kini  sa  mga  Filipino  busa  ang  uban  wa  kaayo  mahasol.

Diha  na  sila  makuyawi  sa  paghapos  na  sa tulo ka  mga dagkong  bawod.

Sa una, ikaduha  ug ikatulong pagpusnga  sa  bawod, nakuratan  ang  tanan  apan ulahi na ang ilang  pangandam.