EDITORYAL - SSS way maayong serbisyo

Mao kini sagad  nga  komentaryo nga  mabati nimo sa tanang miyembro sa Social Security System (SSS) nga may transaction sa maong ahensya.

Ang matag  membro sa SSS pulos bisi sa trabaho, busa sakit alang kanila  nga  malangay  sa ilang  tuyo  sa  buhatan  sa SSS.

Ambot  kun  ngano  usab  kining  ahensyaha  nga  karaan  na man  unta  kaayo  ug  kuwartahan  na, wa man sila’y maayong serbisyo  sa  mga tawo.

May mga guwardiya ug  mga kawani  kuno sa maong  ahensya  nga  kun  imong  pangutan-on  tubagon  ka  og  insulto nga  mura ba  og  hari na kaayo  sila  ug  ikaw  nga  maoy  nagbuhi kanila, suloguon.

Nagtuo  ang  kadaghanan  nga wa maseminar  sa maayong  pamatasan  ang  maong  mga  kawani  sa SSS ug  kun na-seminar man  gipalapos  lang  sa pikas dunggan ang ilang  napaminawan.

Karaan  na  ang  maong  ahensya, apan layo ra sila sa serbisyo  nga  gitunol  sa GSIS, PAG-IBIG ug uban pa.

Busa angayan  lang usab  nga tungohon sila sa mga  tawo kinsa nasayud nga  ang  mga dagkong opisyal  sa maong ahensya  may suhol nga himabaw sa usa ka milyon  ka pesos matag  buwan.

Sa Disyembre momarka na og  minilyon  ang  ilang bonus, unya  wa sila maikog  sa  mga  tawong  nag-amot  aron  sila makuwartahan?