Gikinahanglan ba gyud ang notaryo sa last will?

Ang pagka balido sa Last Will and Testament magdepende kini kun giunsa sa paghimo ug kun gituman ba ang mga provisions sa balaod alang sa paghimo niini.

Apan mamahimo ba ang usa ka tawo nga mo-execute og last Will and Testament nga di na moagi og abogado  ug di na sab panotaryuhan? Kana nga pangutana ang atong tubagon karon sa atong column.

“Dear Atty. Divine;

Aduna ko’y property nga gusto unta nako nga ihatag sa akong pag-umangkon kun mamatay na ko kay wa man ko maminyo ug tiguwang na sad ko. Duha ni ka ektarya ang akong yuta atty  ug kining akong pag-umangkon nga akong hatagan maoy nag-atiman niini. Plano unta nako nga mohimo og Last Will and Testament. Kinahanglan ba gyud nako nga panotaryuhan ang akong Last Will? Mamahimo ba nga ako ray magbuhat sa Last Will ug dili na ko moadto pa sa abogado? Hinaut nga imong matubag ang akong pangutana.

Edgar”

Dear Edgar;

Aduna tay duha ka paagi sa paghimo og last Will and Testament, ang usa gitawag og notarial will ug ang ikaduha gitawag og holographic will. Kining notarial will aduna gyuy gi-specify ang balaod kun unsaon ni siya paghimo basi sa Article 805 sa atong Civil Code. Kinahanglan nga pirmado sa tawong naghimo ang matag pahina niini ug sa iyang pagpirma kinahanglan nga adunay tulo ka testigo nga nagtan-aw nga diin sila mopirma sab sa matag page niini  ug kinahanglan gyud kining panotaryuhan basi sa Article 806 sa Civil Code. Samtang ang holographic will basi sa Article 810 sa Civil Code, dili kini kinahanglang panotaryuhan, wa sab kini magkinahanglan og testigo ug di ka na kinahanglan nga modangop pa og abogado kay ang gikinahanglan ra niini nga sinuwat sa kamot sa naghimo, adunay petsa ug pirmado sa naghimo. Sa ato pa, kun gusto ka nga magbuhat og Last Will and Testament nga ikaw ra ug di na magkinahanglan og abogado, mas maayo nga ang imong buhaton mao kining gitawag og holographic will kon sinuwat lang sa imong kamot unya adunay imong pirma  ug butangan nimo og petsa. Hinaut nga akong natubag ang imong pangutana. Daghang salamat.

Divine

Kun ikaw adunay pangutana, ipadala lang sa Legal Corner sa Banat News sa V. Gullas Street, Cebu City or email sa [email protected]. ug akong tubagon ang inyong pangutana matag adlaw’ng Miyerkules ug Domingo.