Nangita sa mabasol

Gitahasan ni Pangulong Noynoy Aquino ang Justice Department ug Department of Science and Technology sa pag-imbestigar sa kadaghang namatay mugna sa pagbisita dinhi sa nasud sa bagyong si Yolanda.

Tumong sa imbestigasyon mao ang pagsuta kun nagkulang ba sa ilang pagpangandam ang mga lokal nga kagamhanan sa mga dapit nga napurohan sa bagyo nga miresulta sa pagkamatay sa liboan ka mga tawo ug ang pagkawagtang sa daghan pa.

Ang pangulo sa akong pagsabot ning iyang gimando nga imbestigasyon nangita lamang og mabasol sa daghang kinabuhing nakalas sa pagsulod sa bagyong Yolanda sa nasud. Kini tungod kay ang iyang liderato gihukman sa bagyo.

Ang bagyong si Yolanda mao ang mibulgar sa pagka tambaluslos sa kagamhanan ni Pangulong Noynoy. Tungod ni Yolanda nahibaw-an sa katawhan kun unsa ka hinay motubag og emerhensiya ang kagamhanan sa pangulo ug unsa ka porsigido ang iyang gobyerno sa pagpangandam sa mga umaabot nga kalamidad.

Klaro ug tataw sa mga gipanulti ug linihokan sa pangulo nga iyang ipasa ngadto sa mga lokal nga kagamhanan ang pagbasol sa ka daghan sa mga kinabuhing nakalas ug mga tawo nga wala pa igkita. Apan bisan unsaon pa sa pangulo sa paglikay mogimaw gihapon ang kamatuoran nga apil siya sa mabasol kini tungod kay, una, sa bisperas pa lang sa pag-abot ni Yolanda iya nang gipadala didto sa Tacloban City ug ubang mga dapit sa Leyte nga giingong agian ni Yolanda ang iyang mga paborito nga sila si DILG Secretary Mar Roxas ug DND Secretary Voltaire Gazmin aron tutokan ang pagpangandam sa mga lokal nga kagamhanan sa nahisgotang mga lugar. Apan bisan pa man niini daghan gihapon ang mga namatay busa dili epektibo ang ilang pagtutok sa pagpangandam sa umaabot nga kalamidad.

Ikaduha, kun wala pa ang mga tawong nagpakabana, mga non-governmental organisasyon, mga sakop sa Media ug mga langyaw, mas daghan pa gyod seguro ang mga namatay kay madugang man sa gidaghanon ang nangamatay sa kagutom, kauhaw ug katugnaw ingon man mga sakit. Midagan pa ang daghang mga adlaw una pa nakapadala og pagkaon ingon man mainom ang gobyerno ngadto sa mga biktima sa bagyo, gani hangtod karon aduna pay mga dapit nga wala pa gyod maabti og tabang gikan sa gobyerno. Midagan pa ang daghang adlaw una pa makit-i sa gobyerno ang kahimtang sa mga nabiktima sa bagyo.

Mao ni ang pipila ka mga hinungdan kun nganong karon pa lang nangita na si Pangulong Noynoy Aquino og mabasol.