Pagtakob ni Korina sa tinuod gisaway

Daghan ang wa makauyon sa pagsaway ni ABS/CBN Newscaster Korina Sanchez ngadto sa langyaw’ng reporter sa CNN nga si Anderson Cooper, kinsa mibrodkas sa tibuok kalibotan unsa kahinay moresponde ang gobiyerno sa Pilipinas sa mga dagkong suliran nga nanginahanglan og dinaliang tabang ug Diniyos nga pagtagad. Ang paghulagway ni Cooper gibase sa aktuwal niyang nakita ug nasinati.

Matud niya, nga sulod sa lima ka adlaw’ng pag-estar sa Tacloban City, wala siya’y namatikdan nga adunay nangabot nga relief goods nga angay’ng ipang-apod-apod ngadto sa gipanggutom nang mga biktima sa mangtas nga bagyo.

Ang iyang gilauman nga anaay mga lider sa gobiyerno, kinsa magluto bisan lugaw man lang sa unang adlaw human mobiya si Yolanda, aron ipakaon sa mga survivors, kini wala mahitabo. Ug nakapatandog kini sa dughan ni Cooper.

Hinungdan, nga nakomparar niya ang gibuhat sa Japan niadtong giguba sab sa tsunami ang ilang dapit, diin abtik kaayo ang ilang gobiyerno nga misulbad sa higanteng problema nga gibilin sa naasoy’ng kalamidad.

Mi-react si Korina sa maong matin-aw nga pamahayag sa Kanong reporter. Imbes modawat sa katinuod niini, iya pa hinuong gipasiatab nga dili tinuod ang gisulti ni Cooper. Miingon si Korina, nga dihadiha nanghatag gilayon ang gobiyerno og mga hinabang -- suwakhi sa giyagyag sa CNN reporter.

Ang minilyong Pinoy nga nakadungog sa gipanulti ni Korina nga klaro kaayong pagtakob sa tinuod nga gibuhat sa yaya tang gobiyerno, nangasuko!

Dihadiha gipabaha sa Facebook ang ilang grabe nga pagsaway batok ni Korina. Sila ang naulaw sa giyawit ni Korina nga mao ang pagtago sa tinuod. Ug maoy gustong ipatigbabaw niini ang bakak.

Kay bisa’g unsaon pa pagpamakak ni Korina, molugwa man gayod ang tinuod. Ug ang katag makita diha sa gisaysay ni Cooper ug sa mga video footage nga iyang  gitigom aron maoy mosuporta sa tinuoray niyang nasaksihan.

Tinuod man ang gisulti ni Cooper. Nga hinay, dugay ug adunay mga dapit sa nagkaguhayguhay’ng Tacloban City, nga mo usa na lang ka semana hapit ang nakalabay gikan sa paglurang sa bagyong bangis, nga wa gyud makadawat-tilaw sa mga relief goods nga gi-donate sa katawhang nagpakabana, diin ang gobiyerno mismo maoy giintrigahan sa maong mga suplay.

Unya, nganong dili na man lang mokompormi si Korina sa pamahayag ni Cooper? Tungod ba kay ang iyang bana nga si Mar Roxas, kinsa miadto man tuod sa calamity site, pero igo lang nagpa-pogi atubangan sa nagpangidlap nga camera?

Tinuod man ang gisulti ni Cooper. Nga kun tabang gani ang gikinahanglan sa katawhan, atong gobiyerno hinay kaayo. Pero pakitaa’g binilyon nga pork barrel, haskang abtika!

Na’ay, tan-aw ra gud nang gipanghimo sa mga Senador sa Senado, oh? Monay rason nganong wa dayon tay hustong pundo nga magamit panahon sa kalamidad. Monay rason nganong ultimong lugaw dili dayon ta makapakaon sa mga biktima.