Pangilad ug panapi

Nga unta angay kining himuon diha sa pribasiya aron mapanalipdan ang pagkatawo sa biktima. Dungan sa maong  ritwal mao ang paghatag sa mga donasyon gikan sa iyang mga sakop. Pagkaluoy! Ang maong tawo nahimong mapagarbuhon sa iyang buhat. Nawala na hinuon ang elemento sa pagpaubos.

Tinuod kinahanglanon kaayo ang kuwarta ug katigayonan aron kita mabuhi. Apan wala kini maghatag ni bisan kinsa og gahom aron himuon ang pagpanambal ginamit ang pag-ampo ingon nga paagi aron makab-ot ang tumong ug tuyo nga mao ang ginansiya gikan sa imong paghago. Ang pagpangalagad alang sa kaayohan (Healing Ministry) usa ka tawag ni bisan kinsa nga dunay paghigugma ug pagpakabana alang sa mga nagmasakiton. Kay mag-unsa man ang imong gasa kun ugaling imo kining nahuptan kun ikaw mismo ang wala’y kinaiya ug tinguha nga gamiton ang maong gasa sa pag-ayo alang sa pagpangalagad?

Mao nga alang niadtong dunay mga balatian ug gihambin nga mga kabalaka ayaw kamo og duol niadtong mga nagpatuo nga nahuptan nila ang tanang tubag sa inyong mga pangutana labaw na kanila nga mangayo og dayag suhol sa ilang mga pag-ampo ug mga mantra. Sila dili ila sa Diyos, hinunoa, gigamit nila ang Dios aron pag-umol og usa ka hiwi ug bakak nga paglaum alang kanila nga nagkalisud ug nagkinahanglan.