Polis walay gihimo

Dunay among mga silingan nga nangutana kanako kun unsa na kaha’y update sa pagpatay sa silingan namo nga si Alvin “Sadam” Cañete nga gipusil ug gipatay unahan sa Marco Polo Hotel. Akong giingnan nga mora’g wala may gihimo ang kapolisan aron masulbad ang krimen. Lahi lagi g’yud kun ang biktima nga mapatay ilado nga tawo kay magmugna pa ang kapolisan og Task Force nga moimbistigar.

Kun ang gipatay ordinaryo lang nga tawo, sama kanato, wala lang sila’y himoon. Mao lagi kana ang nakadaut. Estrikto ang balaud nga magdili sa mga lisensyado nga firearm holder sa pagdala’g armas apan ang mga kriminal, yano-yano lang nga makadala.

Karon gun ban pa man tungod sa eleksyon sa barangay kaniadtong Oktubre 28 apan ang mga kriminal, walay gun ban.

Tambag nako sa mga polis nga nadistino sa homicide section nga bisan konswelo na lang sa mga pamilya sa biktima aron mahibalo sila nga nag-follow up mo sa kaso, himoa ninyo.

* * *

Wala g’yud atubanga ni Mayor Michael Rama ang bag-ong gitudlo nga fire marshall dinhi sa dakbayan dihang gusto kini nga makigkita kaniya sa iyang opisina sa City Hall.

Nasuko si Mayor Rama kay wala mananghid ang kadagkoan sa Bureau of Fire Protection (BFP) dihang mitudlo sila og hepe sa kabomberohan dinhi sa dakbayan sa Sugbo.

Mora’g wala man hinoon gilatid sa balaud, lahi sa pagtudlo og hepe sa kapolisan, nga ang mayor kinahanglan g’yud nga konsultahon. Na hala, alang ni Chief Inspector Rogelio Bongabong Jr. trabaho lang sir.

Ang nakapait lang kun dili maayo og relasyon ang fire marshall sa mayor kay kun duna kay kinahanglanon nga tabang gikan sa dakbayan dili ka dayon matagad.

* * *

Matag agi nako diha sa dalan Sikatuna nga sakop sa Barangay Day-as magliundok ang mga basura nga wala mahakut. Ambot naglibog ko ngano nga si Engr. Dionesio Gualiza wala makaatiman niini. Utro nga wala makaatiman mao ang mga opisyal sa Barangay Day-as. Pastilan, abi kay lahi na ang kapitan sugod Disyembre 1 ingon na niini ang inyong buhaton?

Pagka walay nada nga batasan. Makauuwaw kaayo kay samtang daghan na kaayo ang mga trak sa basura karon, dili na hinoon maato ang paghakut sa mga sagbot. Pag-syor mo diha uy!

Mora man og gisabotahe daan. Imo pa karong termino Capt. atimana usa kanang problemaha. Duna go’y garbage truck ang Day-as ug ang mga garbage collectors nagdawat pa og dugang honorarium sa City Hall.

Unya, kamo diha sa DPS unsa may rason nga wala man ninyo kini matagad?