Ang way selpon

Ang atong nasud naila na nga texter capital sa tibuok kalibutan. Tungod kay nahimo na natong parte sa kinabuhi ang paggamit sa selpon. Ang kultura gud nato, mora tag magluya kun wa tay higala mahinabi o ma-texan. Ang atong pagkamahimagalaon ug manggihunahunaon, maoy nag-aghat kanato sa paggamit sa selpon. Ug hangtud nahimo nani natong batakang panginahanglan.

Hilabihan na ka haytek ang selpon karon. Mao pa gani nato pagpalit og bag-ong selpon naa na poy manggawas nga mas haytek pa sa atong bag-ong napalit. Makalingaw na gyud ang selpon, kun unsay gusto mong buhaton, naa na tanan. Busa nawani ang atong personal kompyuter o laptop, kay ang selpon mahimo ra man isulod sa bulsa o itakin nga gaan kayo ug dili hasol kun asa kita molakaw.

Gawas pa ana, puwede kana kagamit sa selpon bisa’g maligo o maglangoy-langoy, di madaut. Mahimo gani paligsan o guroy-guroyon. Dili na magaras o mabuak ang bildo na nga LCD. Ug naa pay umaabot nga selpon nga wa pa ikomersyal, puwede lang isud sa pitaka, irelo, isingsing, ibolpen, nga may security ug safety nga kagamitan. Apan hulga gihapon sa panglawas ang radiation niini.

Hinuon, naa pay daghang wa mahilig sa pagbaton og selpon. Tingali tungod sa nadunggan nga mga negatibong epekto. Matud pa sa mga eksperto, maka-impotent ug makadaut kini sa sistima sa atong utok, gumikan sa radiation niini. Wa tay mahimo gawas ato lang gamita’g anti-radiation device, sama sa quantum o nano technology, nga sagad ipapilit sa selpon o ikuwentas nga mora’g necklace.

Apan aduna pay laing mas pang makadaut. Mao ang dili maayo pagkagamit sa selpon. Nga gihimo sa pagdaut o pagbiktima sa isig katawo. Daghang pamilya nagubot gumikan sa selpon. Nangailad nalugos ug uban pang modus sa sindikato sa di maayong kalihokan, pinaagi sa selpon. Mao ang uban, morag nitagam o wa na ganahi mangandoy pang magbaton og selpon, kay naglikay sa kadautan niini.

Apan di sab lalim ang way selpon, niadtong nahimo na niya kining kabahin sa kinabuhi. Ingon sa di kita dali makahimo sa tanang gusto natong buhaton. Dugay moirog ang panahon sa palibot. Laay ug puol ang oras nga di nato kini mapuslan sa dinaliang panginahanglan. Busa ang remedy niani kun dili man kalikayan nga mawa kini kanato, kinahanglang magmatngon ka nga kini magamit gyud sa husto nga di ka madismaya sa mahimong epekto unya ini sa kinabuhi mo.