Ang pagpangandam sa bagyong Yolanda

Nakamugna gayod og mga kadaut ang naghaguros nga bagyong Yolanda  nga miigo sa Sugbo nga giila sa Philippine Athmospheric Geophysical and Astronomical Services Administration  (Pagasa) nga Super Typhoon.

Dihang nagkaduol pa ang mga adlaw sa pag-igo sa maong bagyo daw daghan gayod ang gibati og dili tiaw nga kabalaka tungod kay nakasinati na man god og bangis nga bagyo Ruping nga mikusokuso tibuok  lalawigan sa Sugbo sa bulan sa Nobyimbre sa tuig 1990.

Ang gibati nga kabalaka sa mga Sugboanon sa pag-igo sa bagyong Yolanda tungod kay gihulagway man kini nga labing bangis kun itandi sa bagyong Ruping base usab sa kakusog sa paghaguros niini kun itandi sa bagyong Ruping.

Dugang nga nakapabalaka kay sa pag-igo sa bagyong Yolanda  ang pipila ka dapit sa Kabisay-an nga naglakip sa Bohol ug lalawigan sa Sugbo bag-o pa lang nga nakasinati og 7.2 magnitude nga linog ug gisugdan na usab og laing katalagman nga bagyong Yolanda.

Ang mga relihiyosong pundok sa atong katilingban maoy ilang gihimo ang pagpangaliya ngadto sa Labaw nga  Makagagahom nga ang  bagyong Yolanda nga moigo sa Kabisay-an dili kaayo makamugna og dakong kadaut sa kabtangan ug kinabuhi sa katawhan.

Gidungog ang pangaliya sa relihiyosong katawhan kay bisan gikusokuso ang Kabisay-an wala man kaayo makahatag og dakong kahasol kay gipatapsingan man lang ang mga Sugboanon ug nakabintaha pa daan kay nakahimo na man og sayo nga pagpangandam.