Mangandam ta

Karong adlawa o ugma mosulod sa Pilipinas ang bagyong si Yolanda. Si Yolanda gihulagway nga Super Typhoon tungod sa gikusgon sa hangin niini nga moabot og 225 kilometros ang daganon matag oras nga motadlas sa Eastern Visayas Region kun ugaling dili mausab ang dagan niini. Tungod kay motadlas ang bagyo sa nahisgutang rehiyon, ang tumoy nga bahin sa Sugbo mapiksan gayod kini matud pa sa mga taga PAGASA.

Ang bagyong Yolanda nga giingong moabot karong alas 9:00 sa buntag o ba kaha ugma adlaw nga Biyernes mao na ang ika 24 ka bagyo nga mibisita sa Pilipinas. Ang PAGASA miingon nga extra ordinary na kining mga bagyo nga misulod sa nasud tungod kay sigun sa naandan aduna lamay 20 ka mga bagyo ang mobisita sa Pilipinas matag tuig apan karon milapas na og upat ug anaa pa kita sa ikapito nga adlaw sa buwan sa Nobiyembre.

Tungod sa gikusgon sa hangin nga dala sa bagyo ang mga tinugyanan sa gobyerno kanunay nga nagpahimangno sa katawhan ilabi na gayod niadtong mga nanimuyo sa mga piligrong dapit sama sa kasapaan, kabaybayonan ug kabukiran nga kanunay nga magbinantayon ug maminaw sa mga balita sa radyo ug telebisyon aron makakuha dayon sa mga pahimangno sa gobyerno ug makasunod sa dagan sa panahon.

Ako magaawhag usab kaninyo nga dili magmagahi sa pagtuman sa mga ipagawas nga pahimangno sa atong mga otoridad kay mas nakahibawo sila kay kanato. Giawhag ko usab kamo sa pagpangandam nang daan aron kun moabot man ang bagyo wala na tay laing himoon gawas na lamang sa pagpaniid sa dagan niini. Busa mangandam ta.