Pagbarug pagsugod pag-usab

Atubangan sa padayong kusog nga mga pagtay-og sa Bohol ug Sugbo, nga pulos hinungaw sa magnitude 7.2 nga linog kawhaan ka adlaw nang nilabay, may sukaranan ang kabalaka sa mga ginikanan unsa kaluwas ang ilang mga anak nga pabalikon na sa klase karong semanaha. Nagkauyon ang mga eksperto ug mga molupyo nga mas daghan untang nangamatay kun may klase pa atol sa makalilisang nga linog niadtong Oktubre 15.

Nabanhaw ang kabalaka sa mga ginikanan tungod sa magnitude 5.2 nga aftershock niadtong Biyernes sa gabii human nipasalig ang Philippine Institute of Volcanology and Seismology nga magkahinay ug magkalagyo nang gintang sa mga pagtay-og. Maayo na lang nga nihunong nang kusog nga aftershocks sa bisperas sa pag-abli pagbalik sa mga eskuylahan.

* * *

Usa ra ka hinay nga aftershock ang nabatyagan sa Phivolcs nga nitay-og sa Bohol ug Sugbo sa akong pagsuwat ini: Magnitude 2.5 sa alas-12:58 sa kadlawon sa Domingo, Nobiyembre 3.

Way kahimanan ni teknolohiya nga makahibawo kanus-a mahitabo ug unsay gikusgon sa mosunod nga aftershocks. Bugtong pasalig ni Phivolcs Director Renato Solidum wa nay linog nga mas kusog pa sa magnitude 7.2 nga moigo sa Bohol sa mosunod nga kapin sa usa ka gatos ka tuig.

Apan di makiangayon nga padayong suspensuhon ang klase hangtod nga mahunong nang aftershocks nga mahimong molungtad pa og duha ka buwan.

* * *

Makatabang sa tanang hingtungdan ang kasinatian sa mga magtutudlo, mga tinun-an ug mga ginikanan sa kalungsoran sa Negros Oriental nga naigo sa kusog nga linog sa Pebrero sa niaging tuig. Human sa pila ka adlaw nga pagkasuspenso gibalik ang klase bisan nagpadayon pang kusog nga aftershocks.

Magtutudlo sa Pisong Elementary School sa La Libertad, Negros Oriental nga nihatod og hinabang alang sa mga biktima sa linog sa Bohol pinaagi sa Kapamilya Relief Campaign niangkon nga di sayon ang pag-am-am sa mga bata dihang naatlan sa mga pagtay-og ang ilang klase. Apan nilampos ang mga ginikanan ug mga magtutudlo paghaw-as sa mga bata gikan sa makalilisang nga kasinatian.

* * *

Nipasabot ang magtutudlo nga ang unang gihimo nilang mga dagko mao ang di pagpakita sa ilang kahadlok sa mga pagtay-og. Bisan kusog nang kulba sa ilang dughan gipasaligan ang mga tinun-an nga nagkahinay ug nagkatagsa na lang ang aftershocks. May mga tinun-an nga mas dugay’ng nakalingkawas gikan sa kakulba apan nahibalik rang ilang kadasig sa pagtungha.

Gawas pa, makatabang ang pagpadayon sa mga klase pagkumbinser sa mga tinun-an nga human sa bangis nga linog ug bisan sa kadaghan sa mga nangamatay ug kalapad sa kadaot sa kabalayan, kadalanan, mga taytayan ug ubang kabtangan matag usa nila makahimo sa pagbarug ug paghimo og lab-as nga sinugdanan.

* * *

Email: [email protected]