Bangon

 Tugoti nga magpalahi ako sa akong lindog ning adlawa. Ina kay sama sa naandan, dalitan ko kamo og balak ning higayona agi og pahinungod sa akong mga igsoong Bol-anon nga naigo sa kusog nga linog.

Sa akong pag-abot maoy misugat kanako

ang talan-awon nga karon ko lang makita

mga talan-awon nga makapatibi sa kasingkasing nga nasakitan

tungod sa mga kasakit ug mga kagul-anan.

Kay si kinsa bang kasingkasing ang dili masakitan

kun ang mosugat sa imong pag-abot mao ang nagusbat nga kalikopan

mugna sa kusog nga linog nga miigo sa pinangga kong lalawigan

nga binilin sa akong mga tinamod ug gipasigarbong katigulangang Bol-anon.

Tungod sa 7.2 nga gikusgong linog nga misentro sa pinangga kong lalawigan

naputol ang pipila ka taytayan, nangliki ang mga kadalanan ug midahili ang kayutaan

gibungkag ang kabalayan, gikupog ang mga karaang simbahan ug gipalukapa ang mga inprastraktura.

Apan ang kasingkasing kong mitibi tungod sa mga kasakit nga gibati

hinay-hinay nga nawagtang ug nahupay human nako makita ang pahiyom

sa mga igsoon kong  Bol-anon nga hinay-hinay nang nakabangon

sa makalisang nga linog nga mipatay og gatosan ka mga kinabuhi, miguba sa liboan ka mga butang ug mihasol sa milyones ka mga katawhan.