Away sa BFP bldg di angay padak-on

Wala ko magdahum nga mo-speech si Presidente Noynoy Aquino niadtong Miyerkules sa miaging semana sa primetime sa mga telebisyon aron lang ipasabot ang Disbursement Acceleration Program (DAP) ngadto sa mga Pilipino.

Apan nasabtan nako samtang naminaw sa walay hinungdan niyang speech nga nagkakusog karon ang panawagan batok sa mga misteryosong pagpagawas sa mga pundo gikan sa gobyerno nga panghinganlan lang og bisan unsa pagtago sa tinuoray nga intensiyon niini.

Nagtuo ko nga usa ka “PR strategy” sa Malacañang ang pagpa-speech ni Aquino sa primetime sa mga TV.

Gitinguha ug gipaninguha sa Palasyo nga mopaluyo kang Aquino ug sa iyang administrasyon ang mga Pilipino nga nagtuo pa sa iyang mga programa, ilabi na sa iyang prinsipyong “Daang Matuwid.”

Wala ko masayop. Pagkasunod ugma, adlaw’ng Huwebes, nagpagawas dayon og statement ang Malacañang nga 75% kuno ang positibong feedback sa speech ni Aquino pagpasabot sa DAP.

Wala ba kaha malipong og sukod ang mga PR sa Malacañang nga nakaabot gyud og 75% ang positibo kunong feedback? Imposible kaayo.

Ug nagsunodsunod dayon ang mga pagsaway nganong kinahanglan pang sa primetime gyud mo-speech ang presidente aron lang pagpasabot nga dili angay wagtangon ug undangon ang DAP kay nakatabang (kuno) kini sa mga programa sa gobyerno.

Nagtuo usab ang mga batid sa dagan sa politika sa nasud nga gitumong ang speech sa presidente aron pagpamawi sa nagkatikyaob nga “rating” niini sa survey. Ang katapusang survey nagkanayon nga mi-ubos ang rating ni Aquino kalabot sa kampanya niini sa korupsiyon. Ug nagtuo ang mga batid sa politika nga tungod kini sa padayong pagdupadupa sa presidente sa pagpagawas sa DAP ngadto sa mga piniling politiko.

Alang sa wala masayod, ang report nagkanayon nga ang DAP espesyal nga gi-release sa Malacañang alang sa mga senador nga miboto aron konbiktohon sa impeachment court si kanhi Supreme Court Chief Justice Renato Corona. Ang gipasanginlang nanglista niini mao si Senate President Franklin Drilon.

Apan sa speech ni Aquino, iyang gipasabot nga daghang mga programa ang napundohan tungod sa DAP.

Wala gyud gihapon siya makamata nga inanay nang nakasabot ang mga tawo sa kahaw-ang nianang iyang “Tuwid na Daan.”

* * *

Naglaum ko nga dili na lang modako ang panagbangi tali sa Cebu City Hall ug sa Bureau of Fire Protection (BFP-7) nunot sa paggamit sa BFP building diha sa Natalio Bacalso Avenue alang sa mga pasyente nga namakwit gikan sa Cebu City Medical Center.

Nagtuo ko nga bunga lamang kining ilang panagbangi sa “miscommunication” ug intriga mao nga moulbo kanunay ang kaspa nilang Mayor Mike Rama, Bise Mayor Edgar Labella ug sa mga opisyal sa BFP-7.

Sayop man tuod ang gibuhat sa BFP-7 nga pagdangop sa Commission on Audit aron ipangutana kun dili ba sila paninglan kun makagasto sa padayong pag-okupar sa mga pasyente sa ilang edipisyo. Makalagot pud kini.

Apan sa akong pagpasabot, panagana lang ang gihimo sa BFP-7, ug walay angay ikasuko si Mayor Mike.

Apan kun gusto na gyud kuhaon sa Cebu City Hall ang edipisyo sa BFP-7 diin nagbarog ang Cebu City Fire Department, lain na usab kanang isyu. Asa man sila ibutang?

Kun hinginlan ang mga bombero sa ilang naandan nga estasyon diha sa highway, kinahanglang ilisan sila og laing luna ug edipisyo, dili lang kang papahawaon nga ang BFP ang problemahon asa sila balhin.

Kun buhaton kini ni Mayor Mike ug ni Labella, wala unya silay kalahian ni kanhi Gobernador Gwendolyn Garcia nga mipapahawa sa Department of Agriculture (DA-7) sa ilang compound sa dalan M. Velez sa Guadalupe nga ang nahimong makaluluoy mao ang mga mag-uuma nga serbiyohan sa maong ahensiya.

Ang mga bombero maisip usab nga mga bayani sa atong lugar, sama sa mga polis ug mga sundalo. Kanunay nilang gitaya sa kakuyaw ang ilang kaugalingon sa panahon nga mosulong sila pagpalong sa sunog, pag-rescue matag adunay trahedya ug sa pag-monitor kun luwas ba okupahan ang mga edipisyo.

Samtang masabtan nato ang intensiyon nilang Mayor Mike ug Bise Mayor Labella pagtagad sa kahimtang sa mga pasyente sa CCMC nga anaa karon gi-house sa BFP building, maayong sabton usab nato ang panginahanglanon sa lugar alang sa mga bombero.

Kun adunay angayan estoryahan, angayan lingkoran, dili ipaagi sa kasuko ug interbiyu sa media nga mahimo na hinuong pabilo sa panagbangi.

Maayong masayod kita nga dili silang mga opisyal ang madaot sa ilang panagbangi, kay ang mga tawo maoy mag-antos sa epekto niini.