Silang tanan dili diay kawatan!

Pag-ingon ni Noynoy nga “I’m not a thief …. I did not steal,” ang uban mapasigarbuhon usab nga mipadayag nga sila dili kawatan … wala sila mangawat, specifically, wala sila manghilabot sa pork barrel.

Kun motuo ta ni Noynoy ug sa uban nga nangugat nga sila dili usab kawatan … nan, silang tanan dili diay kawatan. Kun walay kawatan nila, diin kaha paingon ang gisakiyo nga 10 bilyones ka pesos? Ug kinsay nagsakiyo?

Karon, makatumbok ka nga si Noynoy nangawat? Unsa ug pila’y iyang gikawat. Giunsa pagkawat? Gipaagi ba sa mga bogus nga NGO?

Ang tanan heads of state sa tibuok kalibutan, duna gyu’y kaugalingon nga pundo, at his disposal, being head of state. Maoy gusto sa mga tawo ni Gloria nga dili na hatagan og pundo ang Palasyo. Di ko mosugot ini. Ikaw sugot ka?

Isip amahan sa nasud, in our country, amahan sa kapin sa 95 milyones ka tawo, mosugot ka nga dili siya hatagan og discretionary fund? Kun si Binay ang ma-presidente, o si Chiz o si Lacson, o ikaw, sugot ka nga wala kay kwarta nga imong mahikap dihadiha dayon, labi na panahon sa katalagman (simbako?).

Kun duna tay mga ebidensiya sa pangawat ni Noynoy, let’s impeach him. Mag-people power ta. Balik ta sa EDSA. Maayo pag mao ni ang gi-project ni kanhi Chief Justice Puno, imbis kanang signature campaign batok sa pork barrel.

Kapoy na. Mora’g dunay mga effort somewhere pag-divert sa isyu. Ang isyu pangawat. Corruption. Pangawkaw sa salapi sa lungsod. Sa ato nang gibalikbalik dinhi, dugay na kaayo ni nga isyu – panahon pa ni Marcos.

Apan, daghan nang presidente ang nanglabay, karon pa mahitabo sukad nga naukay pag-ayo ang maong isyu. Kini, gumikan sa mga paningkamot ni Noynoy pinaagi sa iyang matuwid na daan – aron once and for all, mahanaw ang corruption.

Apan, sa tinguha paglawgaw sa isyu, si Noynoy na hinuon ang ilang gihulagway nga maoy hari sa pork barrel scam. Moy gidangat!

Dili sayon ang pagpuo sa corruption. Maayo na kining pagkagamot sa atong kahiladman ug kaugatan. Dili kini masanta overnight. Maayo na lang nga ato na kining gisugdan karon. Ang akong gikahadlokan nga after Noynoy … would his successor be bold enough to pursue what Noynoy has started in wiping out corruption? 

Hagit kini kanatong tanan, labi na sa mga pumipili. Kinahanglan nga ang mosunod nga Presidente, magbaton og tumang kaisog pagbatok sa pangurakot. Apan, una sa tanan, siya mismo dili ma-question ang kaligdong ug kalinis.

Sa atong mga lider karon, ma-local o national, kinsa kanila ang makaingon sa tumang kamatinud-anon nga “I did not steal … I am not a thief,” ug dili manglipaghong ang ilang nawong inig pamahayag nila ini?

Si Noynoy sa iyang pag-ingon nga “I am not a thief,” nakasiguro nga walay makatulisok kaniya, walay mosukmat! Ikaw, inig-ingon nimo nga buotan ka, limpiyo ka, dili ka himabaye, manggihatagon ka, wala kahay silingan motulisok kanimo?