Makapugos ba ang employer sa pagbalhin og assignment sa ilang empleyado?

Kun ang atong gobiyerno milatid og mga lagda nga gitumong sa pagprotihir sa katungod sa usa ka trabahante, aduna sab sila’y mga lagda nga nagprotihir sa katungod sa employer o  kompaniya. Apan kanus-a ba nato mamahimong questionon ang desisyon sa usa ka employer o kompaniya? Kana nga pangutana ang atong tubagon karon sa atong column.

Dear Atty. Divine,

Nagtrabaho ko sa usa ka dakong kompaniya nga adunay daghang branches sa Visayas ug Mindanao. Pagkakaron ania ko ma-assign  sa Cebu kay taga Cebu man ko apan karong bag-o gipatawag ko sa among manager kay ila kung i-assign sa lain namong branch sa Mindanao. Naproblema ko niini Atty kay ang akong pamilya akong mabiyaan dinhi sa Cebu kay nag-eskwela man ang mga bata. Ang akong pangutana Atty. kun makapugos ba ang akong kompaniya sa pag-assign nako sa Mindanao bisan kun ako mobalibad? Unsa may maayo nako nga buhaton aron di mahinayon ang pagbalhin kanako og assignment? Salamat og more power sa imong column.— Lando

Dear Lando,

Ang employer o kompaniya nga atong gitrabahoan aduna sila’y gitawag og management prerogative. Buot ipasabot niini nga ang atong gobiyerno dili manghilabot kun unsaon sa kompaniya pagpadagan ang iyang negosyo ug ang Korte mismo dili sab manghilabot niini. Naglakip sa maong management prerogative mao kining pamaagi kun unsaon nila pag-hire og mga empleyado, unsay trabaho nga ilang ihatag niini, unsay mga pamaagi sa pagtrabaho, unsay sundon nga mga palisiya o lagda, unsaon pag-supervise, unsaon pagpanaktak og trabahante, unsaon pagdesiplina ang ilang mga empleyado ug unsaon sa pagtaktak pinasubay sa lagda sa Labor Code .Ang Korte Suprema mismo aduna nay mga desisyon nga giluwatan nga nagkanayon nga ang kompaniya o employer adunay katungod nga mobalhin ngadto sa laing departamento o opisina sa ilang empleyado basi sa gitawag og management prerogative. Hinuon ang labaw’ng hukmanan mihanig sab og mga limitasyon sa maong katungod aron dili abusohan sa employer ang ilang gahum ug kini adunay kondisyon nga ang pagbalhin sa usa ka empleyado. (1.) Aduna gyu’y lig-on basihan ug wa gitumong aron lang paglisud-lisud sa usa ka kawani, (2.)  Kinahanglan usab nga ang pagbalhin dili moresulta sa pag-demote sa position sa usa ka kawani, (3.) Dili moresulta sa pagkunhod sa iyang suweldo ug uban pang benepisyo (Coca Cola Bottlers Philippines, Inc. vs. Del Villar, G.R. No. 163091, January 30, 2009)  (4.) Ug dili usab moresulta sa discrimination ug uban pang dautang tinguha sa employer (Endico vs. Quantum Foods Distribution Center, G.R. No. 161615, January 30, 2009). Buot ipasabot niini nga kun wa makahimo ang imong employer sa akong gihisgutan sa unahan then dili makonsiderar nga illegal ang pagbalhin kanimo sa laing branch sa Mindanao ug hayan dili ka makapugong niini. Apan kun pananglitan ang imong kompaniya nakahimo og mga kalapasan basi sa akong gihisgutan nga mga kondisyon sa Korte Suprema, mamahimo ka nga mopasaka og reklamo  batok niini ngadto sa National Labor Relations Commission or NLRC. Ang maayo nimong buhaton karon kun di gyud ka gustong mabalhin sa Mindanao mao ang pagsuway og hangyo sa imong manager pamasin nga mausab ang iyang huna-huna og dili niya ipadayon ang pagtransfer kanimo sa laing branch.  Hinaut nga akong natubag ang imong pangutana.— Atty. Divine

Alang sa inyong mga pangutana, ipadala lang sa Legal Corner sa Banat News sa V. Gullas Street, cebu City or email sa [email protected]. og akong tubagon ang inyong pangutana pinaagi sa akong column matag adlaw’ng Miyerkules ug Domingo.