Security sa Casino panahon ni Marcos

Panahon ni kanhi diktador anhing Pres. Ferdinand E. Marcos, aduna nay legal nga balay-sugalan. Ug nahibalo ba mo kinsay mga casino security ang iyang gipamutang sa maong establisamento? Gikan sa ultimo ngadto sa top official, pulos mga Presidential Security Guards. Iso’g kaayo moimplementar sa unsay angay’ng patakan sundon sa mga tawong nanulod: ma-empleyado man, o ma-kustomer-walay pili. Ang makasala silotan gyod ... fairly!

Dinhay hitabo nga samtang ang mga dealers nagpaabot og kasakyan diha sa may eskina Salinas Drive paingon sa Nivel Hills, diin didto pa duol sa Cebu Plaza mahimutang ang kasino, gibato bitaw na sila bisa’g nakasakay na sa diyep de pasaheroan. Maayo gani kay way nangaigo.

Gi-report sa mga dealers ang maong hitabo ngadto sa ilang Security Division, kinsa nianang pagka ugma miadto-susi gilayon ang usa ka squad sa mga military nga hetsas sa mga granada ug armalayit. Dihang may nakatumbok nga ang mga estambay diay maoy author sa maong kabuang, dihadiha gipaulanan og mga bala ang yuta nga gipundokan sa mga maldito, kinsa nagkatibulaag og panagan sa nagkalainlaing direksyon.

Bisan ang mga giilang datong maldito, kinsa gikahadlokan sa tibuok nasud tungod sa kadaghag sa goons, basta maghawodhawod kini sulod sa balay-sugalan, di gyod magpanuko pagbunlot ang mga casino security ning maong bagsik gikan sa iyang gilingkoran hangtud ngadto sa investigating room, diin pagka human paylan dayon og banning order sa management. Ug ubay-ubay nang mga milyonaryong gikahadlokan ang nakatilaw sa wala’y gipinig nga patakaran sa balay-sugalan. Hinungdan, nga tanang tawo nga modula’g casino kaniadto puro gyod disiplinado. Taas kaayo’g respeto sa mga empleyado. Hadlok mopasakit, mobugalbugal o mohimo’g kagubot kay sila nasayod nga nahisupak kini sa House Rules sa balay-sugalan, diin oras nga makasala sila, may silot nga ipahamtang kanila.

Gani, may mga linalang man nga mikomentaryo: ‘Nga kun  ikaw kuno adunay kontra, unya gustong maglingawlingaw sa nga walay kulba, way, suod lang kuno sa casino kay kini mao ang lugar nga pinakasepti tagoan. Sanglit, dili lang sa sulod nga may mga intel nga nakasibilyan, kon dili, lakip na sa gawas, diin anaay nanag-roving nga mga military libot sa  tibuok vicinity. May direct contact pa gyod kini sa tanang outlet sa mga militar sa tibuok dakbayan sa Sugbo, kinsa andam ug tagana nga motubag sa mga dinaliang panginahanglan.’

Ingon niini kahait ang mga security measures nga nanagbarog sa tumang kalig-on panahon sa rehimen ni anhing Ferdinand Marcos. Ug naputol lang kini dihang lain nang administrasyon ang namuno sa Pilipinas, diin ang mga Presidential Security Guards giilisan og mga blue guards.

Unta magmalinawon ang October 28 nga piniliay

Barangay election na usab. Daghan ang magpapili sa pagka barangay kapitan ug sa pagka konsehal. Kada usa gustong maoy modaog. Busa, buhaton nilang mga kandidato ang kutob sa unsay ilang mahimo aron ang ilang gitinguhang damgo matuman. Ang pangutana mao: Alang sa kang kinsa bang kaayohan kining tumong sa ilang paglansar? Alang ba sa katawhan, o alang ra sa ilang kaugalingong interest?

Kay kini ra bang pagpangalagad sa katawhan, hago baya! Tiaw bay, kun ikaw maoy mapiling barangay kapitan sa inyong dapit, bisan ikaw natulog na sa tungang gabii, pukawon ka sa mga taga baryo kay mangayog tabang gikan nimo sa nagkalainlain lang matang sa problema nga manumbalay sa inyong nataran.

Ang pagpangalagad usa ka dakong sakripisyo. Ang time nga alang unta sa imong pamilya ug para sa imong kaugalingon sakmiton niini. Apan makalibog. Kay bisan sa kabug-at sa krus nga pas-anon diha sa panerbisyo, mag-ilog gihapon ang matang kandidato sa kinsay makalingkod sa puwesto nga ilang gilansaran. Hala, vote buying, pangdaot sa kontra, panikas ug gani mosangpot pa sa pagpinatyanay ang buhaton aron lamang maoy mogulang mananaog sa kombating lugaynon.

Husto ba ang maong paagi? Maayo bang himoong lider ang kandidato nga naulipon niining matanga sa kinaiya? Sultian tamo, kun siya ang mahimong barangay kapitan o konsehal sa baryo, dili pagpangalagad ang tinuoray niyang tumong; kun dili, pangurakot ginamit ang iyang kadaotan.

Gubot ang gubat sa politika dinhi sa ato. Bisa’g gi-ban ang pagdaladala’g armas panahon sa piniliay, manggawas lang gihapon ang mga guns ug goons. Resulta, may mga kinabuhi nga kalit lang mangahay-ad sa nagkurus nga dalan. Kini, base sa atong nasinati sa miaging mga eleksiyon nasyonal sa atong nasud, diin dunay mga kandidato nga nahiagom sa kapintas sa mga bala.

Atong iampo: “Nga unta magmalinawon ang October 28 Barangay Election dinhi sa ato.”