Ang barangay election karon

CEBU, Philippines - Gilauman sa kapolisan  nga  malinawon  ang election  karong  adlawa  luyo  sa kamatuoran nga  daghan na  ang  namatay ug hapit patya.

Tingale sukad  sa panahon  sa  mga  Katsila, karon  pang  eleksyona  ang  labing  daghan  nga  mikandidato  sa barangay.

Hinuon  alang  sa  mga  pumipili, mas  pabor ang  daghan  ka  og  kapilian  kay  sa  dyutay.

Kay  sa kadaghang  magpapili, ang makakuha  og  daghang  boto  maoy  mahimong  mananaog.

Ang  mga  barangay  karon may daghan  nang  tawo  busa  angay  kining  silbihan  og  mga  opisyal  nga  kugihan  ug  may  hiantigohan  sa pagka-lider.

Usa  sa mga  hiyas  nga  huptan  sa lider  mao  ang  way hilig sa gidiling  druga, sugal, ug  uban  pang krimin  nga  kumon  sa palibot.

Kun  makapili  mo  og  suki  sa  mga  adis-adis,  natural  makaluluoy  kaayo  ang  barangay  tungod  kay  ang  inyong  mga  anak  tudloan  niini  sa pagka-drug addict.

Kun sugarol  ang  inyong  lider, aw natural tua  kini  magyampungad  sa mga  makalingaw  nga sugal  ug  wa kini  laing  atimanon kundi  mao  ang  iyang  bisyo.

Busa  kun  daghan  ang  mga  kandidato  pilia ninyo  ang  buotan, way  bisyo, kugihan  sa  paghatag  og  maayong  pamaagi  aron  ang  barangay  mouswag.

Kasagaran  sa mga  molupyo, pobre, way trabaho,  busa  mao  kini angay  tun-an sa usa ka kapitan  sa  barangay  aron  makatabang  siya   sa iyang  tagi-barangay.