Hapit na gyud ang piniliay

Sa Lunes Oktubre 28 na gyud himuon ang piniliay sa barangay, dinhi na mahibaw-an kun kinsa gyud ang pilion sa mga tawo nga maoy modala sa renda sa pangagamhanan sa matag barangay.

Hinaut unta ang mga tawo mobotar sa ilang kaugalingon nga hukom dili sa kuwarta ug uban pang haylo bugti sa ilang boto kay daghan kaayo sa mga magpapili karon ang tataw kaayong way igong kalidad o abilidad nga magsilbi sa katawhan ug sa barangay.

Ang mga reklamo nga akong nadawat sa akong column usa sa magmatuod nga wala gyu’y gihimo ang ubang mga opisyal sa problema sa ilang mga barangay.

Busa angayan lang nga  magmabinantayon ang mga tawo sa pagpili sa mga opisyal arun dili na ta masayop pagbutang og mga modumala sa atong barangay.  Dinhi sa Sugbo gamay ra ang mga lugar nga girekomendar sa kapolisan nga ipaubos sa areas of concern tungod sa init nga panagbangi sa mga kandidato labi na sa lalawigan sa Sugbo.

Sa Cebu City dunay mga kandidato nga milagda sa peace covenant labi na sa barangay Guadalupe nga maoy labing dako nga barangay sa siyudad sa Sugbo. Pero akong nahibaw-an nga bisan pa sa pinirmahay duna gihapoy ginagmay nga tensyon tali sa mga kandidato.

Manghinaut lang ta nga dili unta moabot sa punto nga duna nay masamdan o makalas nga kinabuhi ang piniliay unya sa Lunes aron hapsay kining mahuman ug maproklamar dayun ang mga mananaog niini. Ang lalawigan sa Bohol unya pa sa Nobiyembre 25 ang ilang piniliay tungod kay giuswag sa Comelec human miigo ang kusog nga linog sa maong lalawigan. Mas maayo ra sab i-uswag ang eleksyon sa Bohol kay dunay ubang mga opisyal sa barangay nga murag gipamolitika na ang paghatag sa mga hinabang ngadto sa apektadong mga molupyo.

Gani duna koy nakit-an sa facebook nga video nga hapit sukmaga sa usa ka giingong kapitan sa barangay sa Buenavista-Bohol kay naglalis sa paghatag sa mga hinabang nganong wala i-agi ngadto sa kapitan ang katungod pagpanghatag niini. Duna pa gyud koy nadawat nga report nga dunay ubang kapitan nga gipili ang hatagan kay kadto rang iyang supporters ang hatagan niini.

Hinaut nga mausab kini nga mga kinaiya kay gigamit man ang trahedya sa pamolitika sa uban kandidato.

Alang sa inyong mga reklamo text lang sa 09071678643