EDITORYAL - Sa linog daghang politiko nga mipahimus

Daghang  mokandidato  sa barangay  nga  buot   mopahimus   sa higayon  samtang  daghan  kaayong  nanginahanglan  og  tabang.

Mas maayo  usab alang  sa  mga  naalaot  sa  linog   kay  daghang  mag-ilog  sa paghatag  og  hinabang  kanila.

Gawas  sa mga  ahensya sa gobiyerno  ug  pribado, bukas  kaayo  ang palad  sa  mga  nanginahanglan  og  hinabang  gikan  sa  mga  politiko tungod  kay  anaa  sila sa hilabihang  panginahanglan.

Sa mga  kandidato  nga  maayo  og  tumong, di  sila  magpanuko  sa pagbubo  og  hinabang  sa ilang  tagi-barangay  nga  namatyan ug nawad-an og  panginabuhi  ug  balay.

Nasayud  na  sila  nga  ang  unang  panginahanglan sa mga  biktima  mao  ang  pagkaon,  tubig, ug  mga  dapat  o materyales  sa ilang  mga  balay.

Tinuod  kun  ang  usa ka kandidato  nga may  maayong  hunahuna  way  laing  masud  sa   isip niini  kundi  ang  pagtabang  aron  nga  makapundar  dayon  og  balik  sa ilang  pagpuyo  ang  mga  nagub-an  og  bay  tungod sa linog. Ingon niini  ang  mga  politiko nga  may  maayong plano  sa kaayohan  sa iyang  isig-katawo,  busa  gusto  siya  nga  mahimong  lider  sa ilang  barangay  aron  nga  makatabang  sa mga  kabus.

Ang  usa ka  politiko  nga  may maayong  plano, di  maglaraw  sa pagpangawat  sa kuwarta  sa gobiyerno  nga  ipiyal  kaniya  kun  anaa  na  siya sa katungdanan kay  nasayud  siya nga  mapriso  ra  gihapon  siya sa  kadugayan.