Sugbuanong tabang sa Bohol

Nangahas mi pagpangayo og hinabang nga pagkaon nga linuto nang daan alang sa mga biktima sa linog sa Bohol nga way klarong ideya kun makasabot bang mga Sugbuanon sa kadinalian sa panginahanglan, maghago ba sila pagtabang sa atong silingang lalawigan nga sila mismo naa pa sa taliwa sa kahadlok sa wa pa mahuman nga pagtay-og tungod sa bag-ong mga linog ug aftershocks sa makalilisang nga linog, o mangasaba sila namo nganong mouna pagtabang sa mga Bol-anon nga duna man say daghang biktima sa linog sa atong kaugalingong nataran.

Samtang nagsuwat ko ini di pa kong katuo sa kapaspas nga nakalihok sa mga Sugbuanon, sa kalunsay sa ilang pag-unong sa mga Bol-anon ug sa nagbaha nilang hinabang.

* * *

Kadaghan uyamot nagbalikbalik ang among mga sakyanan sa ABS-CBN Broadcast Complex sa Dakbayan sa Mandaue ug sa drop-off point sa Fuente Osmeña sa Dakbayan sa Sugbo paghakot sa sinako nga mga puso, kinaldero nga mga lugaw, linung-ag nga mga itlog, bag-o pang haon nga mga pan, linata nga biscuits, sinakong bugas, kinarton nga sardinas ug noodles ug mga binotelyang tubig aron makaapas sa barko sa Naval Forces Central paingon sa Tagbilaran.

Naatol nga ting-panihapon na sa ilang pagdunggo maong naapud-apod dayon ang pasiunang gasa sa mga Sugbuanon sa evacuation centers sa Tagbilaran ug kasilinganang mga lungsod.

* * *

Mas makapatandog sa balatian ang tubag sa mga Sugbuanon sa ikaduhang adlaw sa Kapamilya Relief Campaign alang sa mga biktima sa linog. Dali rang napuno ang dagkong mga trak sa Kapitolyo ug sa Muana Construction ug vans sa usa ka travel agency nga nagtinabangay paghakot sa nagkalainlaing putahe nga gihalad sa mga Sugbuanon.

Daghang salamat sa mga tagduma sa Lite Shipping sa ilang pagdawat sa tanang hinabang nga among nada sa pantalan. Nakargahan sa mga pagkaon ang tulo nila ka barko para Tubigon ug Tagbilaran. Nisugot gani unta si Cebu Governor Junjun Davide nga dad-on ang trak sa Kapitolyo aron makatabang paghakot sa mga hinabang latas sa naapiking kadalanan sa Bohol apan nagnihit sa luna ang barko.

* * *

Usa sa labing talagsaon nga tabang alang sa mga biktima sa linog sa Bohol gitanyag sa Maribago Bluewater Beach Resort. Nga nipagamit sa ilang barge nga "Marle A" aron paghakot og tubig ug mga pagkaon gikan sa Oslob, diin nahimutang ang ilang Bluewater Sumilon Island Resort, diretso ngadto sa Loon, Maribojoc ug ubang kalungsoran ug mga isla nga lisod abton sa naandang transportasyon tungod sa naputol nga mga taytayan ug kadalanan.

Matod ni Consul Julie Alegrado-Vergara, Presidente sa MBBR, mahimo silang makabiyahe kaduha sa usa ka adlaw ug andam silang mokarga sa mga hinabang gikan sa Oslob ug kasilinganang kalungsoran nga ihatod sa ilang Puerto Sumilon.

* * *

Email: [email protected]