Linog! Kalma lang g’yud!

Gikulbaan g’yud tawon ko kagahapon kay samtang magsuwat na unta ko sa akong lindog para karong adlawa, mikalit lang og kurog ang akong balay ug dayon nagkakusog nga daw giuyog na g’yud kini pag-ayo – linog diay.

Kay ang akong opisina nahimutang man sa second floor sa akong balay, mitambo ko sa ubos ug nakita nako nga gitay-og na g’yud ni sa linog. Akong nabati ang singgit sa katawhan nga nagpuyo luyo sa Marco Polo Hotel nga daw nangahadlok.

Si kinsa man kuno ang dili mahadlok nga kun mikusog pa ang linog hayan mangatumpag man gyud ang daghang kabalayan nga anaa gitukod sa bahirig nga bahin sa bungtod.

Pastilan, swerte gani kay kagahapong adlawa walay klase. Kun nahitabo pa nga klase kagahapon, ambot magkabuang tingali ang mga ginikanan sa pagdinaganay paingon sa mga tunghaan aron pagkuha sa ilang mga anak.

Matud sa Philvocs nga tectonic ang hinungdan sa mao nga linog. Kining tectonic quake nagumikan kini sa pagsibog sa yuta gikan sa sunod nga “layer.” 

Mobalik ta sa science. Ang kalibutan dunay upat ka “layers” nga mao ang Earth Crust, Earth Mantle, Outer Core ug Inner Core. Ang Earth Crust mao ang yuta. Ilawom sa Earth Crust mao ang Earth Mantle -- nga tubig. Sa ato pa, naglutaw ang yuta sa tubig. Ang paglihok sa yuta ibabaw sa Earth Mantle maoy gitawag og tectonic.

Ang pagboto sa mga bulkan makamugna usab og linog, apan gitawag kini og volcanic quake. Kadtong linog kagahapon, gitawag kadto og tectonic.

Walay klase sa tibuok rehiyon-7 kon Central Visayas karong adlawa kay susihon pa sa mga technical experts sa Department of Education (DepEd) kun wala ba mameligro ang atong mga tunghaan.

* * *

Magpalain ta. Atensyon health officer diha sa Talisay City. Unsa wala kamo masayud anang illegal nga ihawan nga anaa mahimutang ilawom sa taytayan sa South Coastal Road nga sakop sa Barangay Lawaan 2?

Ang report nga miabot kanako nga ang mga hugaw sa inihaw nga manok anha ra ilabay diritso sa sapa. Pwerte g’yud kuno’ng hugawa. Hapinan ra gud kuno og luna ang ihawan. Uy, unsay gihimo sa mga opisyal sa barangay? Wala kamo masayud niini? O kaha inyo ra’ng gipasagdan? Sigun sa report nga akong nadawat usa ka polis ang nagpasiugda niining maong ihawan.

Aksyoni palihug. Ang usa ka polis nga magnegosyo, basta dili lang apektado ang iyang pagserbisyo sa pagka polis, usa ka dalaygon nga buhat apan kinahanglang sundon gayud ang balaud.