Idirekta’g tabang ang pundong kuwarta

Adunay sektor sa katilingban sa nasud nga tinuod nga maapektohan sa pagpugong sa Supreme Court sa pundong kuwarta nga nahabilin sa pork barrel, nga dili una kini ihatag ngadto sa mga senador ug kongressman. Ug kini mao ang mga kabos nga mga pasyente ug mga eskolar nga nagsalig sa tabang sa mga magbabalaud sa nasud.

Adunay mga ospital sa gobiyerno nga gipundohan sa mga kongresista og kuwarta gikan sa ilang pork barrel aron matambalan ang mga kabos nga mga pasiyente. Usa na niini ang Vicente Sotto Memorial Hospital. Daghan ang mga timawang pasiyente nga nagsalig niining maong ospital nga malibre sa mga tambal aron maayo sa ilang sakit.

Apan tungod aning pag-freeze sa Supreme Court sa nahabiling pork barrel sa mga magbabalaud sa nasud nga dili mahatag kanila, misamot kaalaut ang mga kabos nga mga Pilipino nga wala’y laing kadangpan nga ospital alang sa pagpatambal kun dili ang ospital sa kagamhanan nga ang nagpundong kuwarta alang sa mga tambal ug uban pang kagamitan alang sa pagpanambal mao ang mga magbabalaud sa nasud gikan sa ilang PDAF.

Dili lamang ang mga kabos nga pasiyente ang naapektahan niining dakong eskandalo sa pork barrel scam kun dili ang mga kabos usab nga mga eskolar sa eskuylahan. Nakatungtong sila sa kolehiyo o kaha sa haysikol bisan sa kalisod sa pagpuyo tungod kay gitabangan sila sa uban natong mga kongresista ug mga senador pinaagi sa ilang pork barrel. Unsaon nila sa pagpadayon sa ilang pangandoy nga makahuman og kurso nga wala na may pork barrel ang gisaligan nilang mga tawo? Mogamit kaha kining mga tawhana sa kaugalingon nilang kuwarta aron ipadayon ang pagsuportar sa ilang mga eskolar sa eskuylahan?

Lisud kining  mahitabo. Ug ang makaluluoy mao ang mga kabos nga mga Pilipino nga nagsalig sa tabang sa mga magbabalaud sa kongreso ug sa senado nga naangin sa pipila ka mga senador ug kongresista nga giingong nangawkaw sa kuwarta sa gobiyerno nga gikan sa atong buhis.

Pagkaalaut gyud sa Pilipinas nga nakabaton og mga magbabalaud nga wala’y laing gilantaw kun dili ang ilang kaugalingong kaayohan lamang.

Ang labing maayong buhaton sa gobiyerno mao ang pagdirekta’g tabang niining mga kabos nga mga Pilipino pinaagi sa paghatag kanila‘g tabang pinansiyal gikan sa nahabiling pork barrel sa gi-freeze nga pundo nga kuwarta aron dili sila mapasagdan.