Lakwatsa
Labihang nakapanalipod ni bokal Grecilda Sanchez Zaballero sa tinguha sa 10 ka mga sakop sa hunta probinsiyal nga mobiya paingon sa New York sunod buwan alang sa usa ka semana nga study tour. Matud ni Zaballero importante nga ilang masayran ang mga pamaagi unsaon pagsumpo ang drug abuse ug unsaon ang epektibo nga paagi sa drug rehabilitation.
Tinuod angayan nga masayran ta ang maong mga butang. Apan dunay tukma nga mga opisyal ug ahensiya ang angayang mohimo sa maong pagtuon.
Unsa may trabaho nilang mga board member? Paggukod ba gud sa mga durugista? Pagpadagan ba gud og rehabilitation center? Ang ilang tahas mao ang pagpanday og mga ordinansa alang sa atong lalawigan.
Kun suliran sa drugas ang hisgutan, dili ni masulbad og lakwatsa. Ang gikinahanglan aron pagsulbad sa problema mao ang seryoso ug makanunayon nga kampanya sa mga awtoridad.
Wala ta magkuwang og balaud mahitungod niini. Gani bag-o pa man na nga nahimo ang Comprehensive Dangerous Drugs Act.
Kun tinuod nga kinahanglanon gyud kaayo sa lalawigan ang kasayuran nga ilang makat-onan sa maong workshop didto sa New York, ayaw sad intawon mo pagpanon didto.
Usa o duha ka bokal bastante na nga makahimo og mga polisiya unya alang sa probinsiya. Ang akong sugyot nganong dili man ang chairman sa committee on drug abuse prevention ug ang chairman sa committee on peace and order maoy inyong ipadala.
Nganong di man hinuon mokuyog si bokal Carmen Meca? Unsa man say kapuslanan ni bokal Aladdin Caminero didto nga mapupos naman iyang termino karong Nobiyembre 30?
Klaro nga pag-usik usik sa kwarta sa katawhan sa probinsiya ang gustong mahitabo ni Zaballero.
Pagbaton sab tawon mo og bisan dyutay na lang kaikog sa mga magbubuhis. Daghan ang mas labaw nga nagkinahanglan sa kwarta sa lalawigan kaysa inyong lakwatsa.
Way magbuot kun gusto mo mobiyahe apan gamita ang inyong personal nga kwarta. Ayaw gastoha ang singot ug dugo sa mga magbubuhis alang sa inyong kapritso.
* * *
- Latest
