Kaminyoon nga wa marecord sa NSO balido ba?

Ang pari, pastor, huwes, mayor o si bisan kinsa nga mo-solemnize sa kaminyuon adunay responsibilidad sa pagduso sa Marriage Certificate ngadto sa Local Civil Registrar aron  ang maong kaminyuon ma-record ug maduso ngadto sa National Statistics Office kon NSO. Apan kun ang solemnizing officer mapakyas sa pagtuman sa iyang gimbuhaton hinungdan nga dili ma-record sa NSO ang kaminyuon maapektuhan ba ang validity niini? Kana nga pangutana ang atong tubagon karon sa atong column.

“Dear Atty. Divine,

Aduna koy ipangutana kanimo attorney labot sa status sa akong kaminyuon. Gikasal mi niadtong miaging tuig ug aduna na mi usa ka anak. Niadtong miaging buwan nagkuha unta ko og Marriage Certificate sa National Statistics Office or NSO  kay akong gamiton sa akong SSS apan wa man mi record ngadto. Misuway sab ko sa pag-adto sa Local Civil Registrar kay basin wa nila ma-forward sa NSO apan wa man sab nila makit-i ang among marriage contract. Klaro man gyud to amo kasal attorney kay duna man gani mi gipirmahan human sa among kasal. Ang akong pangutana karon atty kun balido ba kadtong among kaminyuon nga wa man ma-record sa NSO? Unsa may angayan namo nga buhaton?  — Gina

Dear Gina,

Kun inyong natuman ang tanang rekisitos ilabi na gyud ang marriage license, unya dunay ceremony nga nahitabo, ug ang solemnizing officer nga nagkasal ninyo adunay authority nga mokasal, way duda nga balido gyud ang inyong kaminyuon. Ang solemnizing officer maoy adunay responsibilidad sa pagpadala ngadto sa Local Civil registrar sa duplicate ug triplicate sa kopya sa inyong Marriage Certificate sud sa 15 ka adlaw gikan sa inyong pagkasal (Article 23, Family Code). Adto kini niya ipadala sa Local Civil Registrar diin mo gikasal. Kun wa ma-record sa NSO ang inyong Marriage Certificate o sa Civil Registrar wa kana magpasabot nga peke ang inyong kasal o dili balido. Posible lang nga ang solemnizing officer nga nagkasal ninyo wa makaduso sa inyong Marriage Certificate sa Civil Registrar o ba kaha ang Civil Registrar napakyas sa pag-record niini. Ang maayo nimong buhaton karon mao ang pag-adto sa nagkasal ninyo aron sa pagpangayo sa kopya sa inyong Marriage Certificate or kun aduna moy kopya iduso ngadto sa Local Civil Registrar alang sa late registration sa inyong kaminyuon. Hinaut nga akong natubag ang imong pangutana. Thanks and God Bless.— Atty. Divine

* * *

Alang sa inyong mga pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana matag adlaw’ng Miyerkules ug Domingo pinaagi sa akong column.