Tingog sa Katawhan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gitudloan ang kabataan sa korupsiyon

Karong panahona mora’g nakalimtan na gayod ang giingon sa atong bayani nga si Dr. Jose Rizal, nga ang kabataan maoy paglaom sa nasud. Naunsa na man ron? Kahatagan ba’g katumanan ang panglantaw ni Rizal?

Sa kabahin pa lang sa Sangguniang Kabataan (SK), ato nang mabalanse ang dakong kalainan niini. Sa eleksiyon sa SK, anaa ang pagpamalit og botos. Hunahunaa lang gud, hut-ong kini sa kabataan nga gibansay sa pagpanday sa mga maayong buhat ug pag-ugmad og kaayohan sa komunidad.

Apan ang nahitabo karon mora’g gihimo ang SK nga training ground sa pagpangawkaw sa kuwarta sa gobiyerno. Gitudloan sila sa hiwi nga binuhatan. Ang mga botante nga kabataan alang sa SK, maantigo nang maniid kun kinsa ang mohatag nila’g kuwarta kay maoy ilang botaran sa panahon sa SK election.

Gianad na sila sa tradisyon nga ang eleksiyon panahon sa pagpanguwarta sa mga botante, modawat sa pikas ug pikas nga kandidato sa gipanghatag nga kuwarta. Ug kining maong kinaiya siguradong madala sa kabataan hangtod na sa ilang paghingkod.

Panahon na tingali nga wad-on sa gobiyerno ang SK. Dili pa ulahi kun itisok sa ilang kaisipan nga silang mga kabataan maoy paglaom sa nasud alang sa kauswagan sa komunidad ug maayong panggobiyerno.