Walay kapuslanan

Tungod sa kadaghan sa mga proyekto nga buot ipatuman ni Mayor Michael Rama nalimtan na lang ang uban mao nga misiaw pag-ayo kining mga drayber sa “habal-habal” nga motorsiklo.

Kining mga gitawag og habal-habal makatabang kini kaayo sila aron madali ang pag-adto sa usa ka tawo sa iyang padulngan, apan usahay lang kay kining mga drayber pasumban na lang ‘sab nila ang ilang kaabusado.

Daghan kaayo ko og nadawat nga mga reklamo kabahin sa habal-habal kay lagi magbabag diha sa agianan sa mga sakyanan. Mao nga akong gihimoan og pakisusi ug namatud-an nako nga tinuod g’yud.

Una, si Mayor Rama sa bag-o pa nga lingkod pagka mayor mitukod siya og Oplan Hagibis nga gitumong aron kampanyahan ang mga drayber sa habal-habal, dili kay aron sila pahunongon sa ilang pangita, kun dili aron dili sila moabuso.

Apan naunsa man ang Oplan Hagibis? May Oplan Hagibis pa ba gud karon? Aw anaa tingali apan wala maglihok ug naghinan-aw lang sa problema kabahin sa mga habal-habal.

Nakasabut ko sa rason niini kay unsaon nga ang gitudlo sa mayor nga pangulo sa Oplan Hagibis mao man ang iyang city administrator nga pwerteng daghana og trabaho.

Dili na maato ni Atty. Jose Marie Poblete ang maong gimbuhaton. Nganong dili man ihatag sa mayor ang maong katungdanan ngadto sa CITOM o kaha magtudlo siya og laing tawo nga piyalan niya sa maong gimbuhaton?

Kadaghan diha sa mga kawani sa City Hall nga matahasan.

* * *

Gisusi nako ang reklamo kabahin sa mga habal-habal diha sa eskena Sudlon ug Gorordo Avenue sa Lahug. Husto g’yud ang mireklamo kanako kay ang mga motorsiklo sa mga habal-habal draybers anaa giparada sa dapit sa likoanan.

Nag-obserbar ko sulod sa mga 15 minutos ug nakita nako nga maglisud tawon ang mga sakyanan nga mosulod paingon sa Beverly Hills kay anaa man ang mga motor sa daplin sa karsada dapit sa eskena.

Laing gireklamo, mao ang mga habal-habal drayber nga anaa magpunsisok sa tungasan paingon sa Busay – dapit sa eskena Salinas Drive kay usahay mobabag sila sa agianan sa mga sakyanan.

Sa Barangay Tisa pwerteng daghana nga mga motorsiklo nga gigamit isip habal-habal nga makababag sa pag-agi sa mga sakyanan. Samtang didto sa Inayawan daghan usab ang nangreklamo sa mga drayber og habal-habal kay mao gihapon, anha magbabag sa agianan sa mga sakyanan.

Kun gipalihok pa lang g’yud unta ang CITOM ug ang Oplan Hagibis, natul-id na tingali kining maong baliko kaayo nga pagpanginabuhi aning mga drayber sa habal-habal.

Dili ko supak nga dunay mga tawo nga manginabuhi pinaagi sa habal-habal apan kinahanglang mosunod sila sa lagda.