Pasidaan sa uwan seryusuhon

Matag adlaw may thunderstorm advisories nga luwatan si Direktor Oscar Tabada sa Pagasa Visayas. Mopasidaan siya sa pagbunok sa uwan sa nagkalainlaing bahin sa Sugbo ug Kabisay-an. Kasagaran matinuod ang pasidaan nga labihan kamapasalamaton sa mga nakadawat sa kasayuran kay naggiyahan ang ilang kalihokan ug nakalikay sila sa kalit nga pagdaot sa kahimtang sa panahon.

Usa ni sa kausaban nga gipatuman ni Tabada sa pag-abot sa moderno nilang kahimanan ug pagdugang sa mas takos nilang mga kawani. Sa una maapsan sila sa uwan. Karon gipaningkamotan nila nga maluwatan na ang pasidaan usa o duha ka oras sa di pa ang uwan.

* * *

Bisan sa katukma sa thunderstorm advisories sa Pagasa wa hatagi og samang pagtagad sa naandan nga weather bulletins sa mga bagyo. Lisod kumbinsihon ang publiko nga ang pagbunok sa uwan mahimong makahatag og mas dakong kadaot kay sa tinuod nga bagyo.

Maong tali sa thunderstorm advisories sa Pagasa Visayas ug sa weather bulletins sa ilang ulohang buhatan mahitungod sa bag-ong bagyo nga si Ramil ang bagyo maoy mas gisunod. Bahala na kun si Ramil tua ra sa Itbayat, Batanes, sa amihanang tumoy sa Pilipinas diin nag-abot ang Pacific Ocean ug ang South China Sea, ug ang mga pasidaan sa uwan gitakdang moigo sa Sugbo ug Kabisay-an.

* * *

Wa katabang sa pag-alerto sa publiko sa kaseryuso sa hulga sa uwan nga natunong og weekend. Nagsugod og bunok ang uwan sa Negros Oriental niadtong Biyernes sa gabii ug nagpadayon sa Sabado ug Domingo. Kanus-a ang atensiyon sa balita sa publiko ug bisan sa mga sakop sa media di ingon ana kadako tungod sa mas daghang karibal nga kalingawan ug personal nga kalihokan sa mga pamilya.

Dako sang tentasyon sa publiko sa pagpangiyugpos kay ang matag weather bulletin sa Pagasa sa bagyong Ramil gipaikogan sa pasalig nga layo ra kaayong bagyo gikan sa yuta nga bisan nagkakusog di makaapektar sa bisan asang bahin sa nasud.

* * *

Gibasol ni Direktor Tabada ang pagkusog sa habagat, nga gibanabanang naghagiyos sa gikusgong 30 ka kilometro matag takna, nga maoy hinungdan sa pagdagko pag-ayo sa bawod. Ang paglapad sa bawod sa seawall sa Dumlog, Talisay City maoy nakapagusbat sa pipila ka kabalayan.

Gitumbok sang Tabada nga nagdungan pag-awas ang mga suba sa Negros Oriental ug Negros Occidental kay nadungan ang pagbunok sa uwan sa pagdako pag-ayo sa taob sa dagat. Tungod ini nakahukom mi sa DYAB Radyo Patrol nga ang thunderstorm advisories sa Pagasa Visayas among hatagan og samang importansiya ug among isibya sa labing daling panahon aron paggiya sa mga molupyo, mahinayon man o dili, kusog man o hinay ra, ang pagbundak sa uwan, mosangpot man o dili sa pagbaha ug pagdahili sa yuta.

* * *

Email: [email protected]