llegal nga Sugal

Wala g’yud diay magbinuang ang akong inpormer sa Barangay Ermita nga mireport kabahin sa pagbalik sa operasyon sa video karera diha sa maong dapit. Tuod, nasakmit sa mga polis sa Carbon ang mga video karera ug moli-moli machines.

Gihisgutan nato kini dinhi sa atong lindog sa miaging semana. Nagduha-duha man gud unta ko pagsuwat niadto kay duna may nagsulti nga mihunong na ang video karera operation.

Ang wala pa maaksyoni sa atong mga polis ang gireport nga duna ‘say video karera nga gipa-operate diha sa A. Lopez, sakop sa Barangay Calamba. Ang atong inpormer sa Barangay Tejero, luyo sa kanhi provincial jail, mireport nga namalik ‘sab kuno sa ilang lugar.

Apan gisugo nako nga kuhaon gayud ang mga ngalan sa tag-iya sa balay nga gibutangan niining maong illegal nga sugal kay para sayon ra sa kapolisan. Dili gayud mapuo kining maong sugal kay ang akong nasayran nga ang mga orihinal nga operator nanghunong na, apan naa lang gihapo’y mipuli kanila?

Unya, Kernel Romana, atimana kining tigbakay diha sa Banawa kay polis nga apelyedo og “C” ang giingon nga tigpasiugda niini basi sa report nga akong nadawat sa mga tawo diha nga wala makagusto sa tigbakay.

Uy, diri ‘sab diay sa gitawag og “grotto” unahan sa GMA-7 Complex nga sakop sa Barangay Apas, duna’y gitukod nga roydahan sa tigbakayan diha. Pagka klaro gayud sa maong roydahan kay anaa gayud sa taliwala sa dakung hawan.

Wala g’yud ko mobilib sa mga polis nga gitahasan paghimo’g kampanya batok sa illegal nga sugal kay bisan og dayag kaayo ang illegal, apan wala’y nahimo. Unya kun may mga manok-hiniktan ‘sab nga masakmit, mangawala ra.

Daku g’yud kining hagit kang Kernel Romana nga molihok pag-ayo. Ayaw’g huwata Kernel nga sawayon ka pag-ayo sa katawhan tungod sa kapakyas sa pagsumpo sa illegal nga sugal.

Unya gawas kang Kernel Romana, si Mayor Michael Rama mismo angay’ng magmonitor kanunay kun giunsa sa iyang paborito nga opisyal ang paghimo’g kampanya batok sa illegal nga sugal kay siya man ang miinsistir nga si Romana ang hepe sa Cebu City Police Office.

Kun basahon nimo ang lagda nga gilatid sa balaud, ilabi na sa Republic Act 8551, giklaro gayud sa balaud nga ang kampanya batok sa illegal nga sugal ubos gayud sa “control” sa mayor.

Pananglit kun dunay mga ireport nga tigbakay sa usa ka barangay, dili tukma nga bawson lang pagpangutana sa mayor ang reporter pinaagi sa pag-ingon “Ngano sa inyong barangay wala ba’y tigbakay?”

Kun adunay tigbakay sa usa ka barangay nga sakop sa dakbayan, ang angay’ng himoon mao nga imando sa kapolisan nga himoan kini’g operasyon.