EDITORYAL - Bong mibalibad sa pelikula nga Sugo

Gumikan sa kontrobersiya  nga  nahiaguman sa iyang  pagka-senador, pagkatawo ug  kinabuhi, gibalibaran ni Senador Bong Revilla  ang  pelikula  nga  “Sugo”.

Kini may labot sa papel sa Sinugo ug  Pagdumalang Pangkatibuk-an karon sa Iglesia ni Cristo.

Wala siya dayga tungod sa pagkalambigit  niya  sa  mga giingong  anomalusong  transaksyon  sa  buhis  sa katawhang Filipino.

Ang iyang pagbalibad  tungod  kay di siya gustong  maangin ang  dungog  sa INC  sa gidangatan sa iyang  pagkatawo ug  pagka-senador  sa nasud, usa  sa angay  pasalamatan  sa mga  sakop sa maong relihiyusong pundok.

Dinhi sa maong  punto, magpasalamat  ang  INC kay  wa mahinayak  ug wa pa mahuman  ang  maong pelikula nga  si Bong maoy nagda  sa papel sa kasamtangang  pagdumala  sa INC.

Apan  bisan  pa tingale  kun  nahuman  na  ang  maong  pelikula, mahimong  gisalida na, kun  naabtan  nga  ingon  niini  ang  nahitabo  kang  Bong, di angay  nga  iangin  sa maot  niyang  dungog  ang  INC.

Sa P10 billion pork barrel fund scam, naguba  ang  pagkatawo  ni Bong  gawas  kun  mapamatud-an  nila  nga way lama  nga  panikas  ug pangawat  sa ilang pork  ang  iyang  pagkalambigit  niini.